DILI, 08 Maiu 2025 (TATOLI)—Sekretáriu Estadu Komunikasaun Sosiál (SEKOMS), Expedito Loro Dias Ximenes, partipasa reuniaun ASEAN Ministers Responsible for Information (AMRI–sigla inglés) ba dala 17 iha Bandar Sri Begawan, Brunei Darussalam, durante loron neen (04-09 Maiu).
Iha reuniaun ne’e reafirma importánsia hodi promove komunikasaun The Association of Southeast Asian Nations (ASEAN) ida-ne’ebé reziliente no sentralizadu.
“Reuniaun ne’e reafirma importánsia hodi promove Komunikasaun ASEAN ida-ne’ebé reziliente no sentradu iha ema hodi rezolve dezafiu sira-ne’ebé mosu hosi uzu sala hosi meiu komunikasaun sosiál sira, inklui propagasaun hosi informasaun falsu sira, diskursu ódiu nian no esplorasaun online,” sita komunikadu ne’ebé TATOLI asesu husi Ajénsia Notísia Bernama, kinta ne’e.
Iha enkontru AMRI ba dala 17 ne’e, inísia ho deklarasaun ho naran Deklarasaun Kuala Lumpur kona-ba utilizasaun seguru ba mídia sosiál.
Iha deklarasaun konjunta ba mídia ne’ebé fó-sai iha konferénsia nia rohan, ASEAN repete ninia kompromisu koletivu atu haburas ambiente dijitál ida-ne’ebé seguru, inkluzivu no responsável iha rejiaun tomak.
Tuir deklarasaun konjunta, AMRI apoia mós “Deklarasaun Bandar Seri Begawan hodi Reafirma Kompromisu hosi Ministru sira ASEAN nian ne’ebé Responsável ba Informasaun ba Avansu Estratéjiku sira iha Mídia no Informasaun”.
Hafoin konferénsia Ministru informasaun ASEAN, Sekretáriu Estadu Komunikasaun Sosiál, Expedito Loro Dias Ximenes, tranzmite Prezidente Repúblika, José Ramos no Primeiru-Ministru, Xanana Gusmão, nia kumprimentu no agradesimentu ba Sultan Brunei Sultan Haji Hassanal Bolkiah Mu’izzaddin Waddaulah iha ninia rezidénsia, relasiona ho Brunei nia apoia ba Timor-Leste nia adezaun ba ASEAN.
Sultan Haji Hassanal Bolkiah Mu’izzaddin Waddaulah hanesan Sultan ba dala 29 hosi Brunei no hala’o ona kna’ar dezde tinan 1967. Sultan Hassanal Bolkiah mós hala’o kna’ar nu’udár Primeiru-Ministru Brunei nian dezde independénsia nasaun nian iha tinan 1984.
Jornalista: Natalino Costa
Editór: Xisto Freitas da Piedade
