DILI, 12 Maiu 2025 (TATOLI)—Prezidente Tribunál Rekursu (PTR), Afonso Carmona, lakohi fó komentáriu kle’an kona-ba pedidu kontestasaun Providénsia Kautelár husi Juiza Maria Natércia G. Ferreira hodi kontesta desizaun Xefe Estadu José Ramos Horta ne’ebé nomea nia hanesan PTR.
“Ha’u seidauk ko’alia kona-ba ida-ne’e. Buat sira-ne’ebé mak sei iha prosesu, ha’u sei la ko’alia,” Carmona hateten ba jornalista sira iha Sentru Formasaun Jurídika Judisiária, Kaikoli, Dili, segunda ne’e.
Tuir nia katak pedidu kontestasaun ne’ebé Juiza Maria Natércia hatama ba Tribunál ne’e la’ós atu kontra nia maibé pedidu referidu kontesta desizaun Xefe Estadu José Ramos Horta nian.
Rekorda fali katak, Juiza Dezembargadora Tribunál Rekursu, Maria Natércia, hatama pedidu kontestasaun Providénsia Kautelár hodi kontesta desizaun Prezidente Repúblika, José Ramos Horta, ne’ebé nomea Prezidente Tribunál Rekursu, JuízAfonso Carmona, tanba nia konsidera nomeasaun ne’e kontra norma no Konstituisaun.
Pedidu Providénsia Kautelár inominada ne’e ho karater urjénsia hodi husu ba Trubunál Judisiál Primeira Instánsia Dili hodi sita Prezidente Repúblika, José Ramos Horta, hodi fó resposta iha prazu loron sanulu nia laran.
Jornalista: Natalino Costa
Editór: Xisto Freitas da Piedade
