DILI, 09 Maiu 2025 (TATOLI)—Vise Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, sesta ne’e, lansa Website Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA), hodi halo monitorizasaun ba servisu AIFAESA nian iha terrenu.
“Lansamentu website ida-ne’e importante tebes atu tau-matan ba servisu sira-ne’ebé mak iha terrenu, tanba ita mós atu tama ASEAN ita tenke iha teknolojia ne’ebé mak di’ak hodi haree ba ita-nia kreximentu ekonómiku sira-ne’e bá-oin,” kalbuadi dehan banhira lansa website no mós inaugura cobe house AIFAESA, iha Matadouru, Dili.
Nia dehan bainhira Timor-Leste tama iha ASEAN AIFAESA nia servisu sei barak liután tanba ne’e servisu didi’ak hodi hadi’a rai ida-ne’e ho di’ak.
Iha fatin hanesan, Inspetora Jerál AIFAESA, Odete Viegas, dehan sistema dijitalizasaun importante tebes ba instituisaun hotu-hotu, la’ós AIFAESA de’it maibé ho rekursu umanu ne’ebé mak limitadu mak uza sistema dijitalizasaun ne’ebé efisiente no efikás liután.
“Rezultadu ka relatóriu sira-ne’e ita bele hetan iha oras 24 nia laran, tanba ida-ne’e mak ami-nia ekipa sira foti inisiativa halo sistema dijitalizasaun ba sistema hotu-hotu nune’e ita bele kontrola servisu sira iha terrenu,” Odete informa.
Nia esplika, sistema dijitalizasaun ne’e di’ak, ezemplu hanesan tinan kotuk liubá iha situasaun COVID-19, médiku sira tun halo servisu dadeer, depois lorokraik sistema ne’e hatudu kedas rezultadu ema hira mak pozitivu, entaun sistema ida-ne’e halo hanesan ne’e, atubele haree ekipa AIFAESA sira tun ba servisu iha terrenu halo inspesaun nune’e inspetora bele hatene sira halo inspesaun ba loja hira.
Nia dehan, iha lansamentu website ne’e, inaugura mós cobe house ba funsionáriu AIFAESA sira hodi utiliza halo servisu.
“Ami mós ohin inaugura cobe house, lansamentu ba website, fó sertifikadu rekoñesimentu ba funsionáriu AIFAESA tomak no mós lansamentu ba plaka AIFAESA nian,” nia relata.
Konstrusaun ba cobe house AIFAESA ne’e ho totál orsamentu tinan 2024 nian hamutuk $126.000-resin no ita-boot sira haree pavin ne’ebé halo iha arredór AIFAESA nian ho OJE 2024 ho monatante rihun $45.
“Empreza ne’ebé mak halo konstrusaun ba cobe house naran Planalto no empreza ne’ebé mak halo pavin ho naran Kotawaki. Empreza hirak-ne’e timoroan nian,” Odete tenik.
Jornalista: Felicidade Ximenes
Editór: Xisto Freitas da Piedade
