DILI, 09 Maiu 2025 (TATOLI)—Peskizadór Seniór Sistema Monitorizaun Sistema Judisiáriu (JSMP-sigla inglés), Luís Oliveira Sampaio, hateten JSMP lansa ona relatóriu anuál 2024. Iha relatóriu JSMP kontinua husu ba Tribunál atu aumenta rekursu umanu hodi hadi’a servisu iha Tribunál liuliu iha parte juíz sira hodi redús kazu pendente sira.
“Ami-nia relatóriu anuál 2024 ne’ebé ami foin lansa iha fulan kotuk, buat ne’ebé ami hetan mak menus rekursu umanu iha Tribunál, menus fasilidade no infrastrutura sira no mós buat ne’ebé ami hetan mak julgamentu ne’ebé lahó pontualidade. Ida-ne’e parte ida viola ema-nia direitu,” Luís hateten ba jornalista TATOLI iha nia kna’ar fatin, Kolmera, sesta ne’e.
Nia dehan, menus rekursu umanu no atividade julgamentu ne’ebé mak lahó pontualidade iha Trubunál ne’e mós kontribui ba númeru kazu iha Tribunál kontinua aumenta.
“Ami aree kazu tinan bá tinan aumenta, ida-ne’e mós ita haree husi ita-nia rekursu juíz sira-ne’ebé menus no julgamentu sira-ne’ebé dalaruma sempre la pontuál. Juíz sira loron ida atende kazu tolu to’o haat, entaun tenke halo adiamentu kazu ida, arguidu/a inklui lezadu/a sira husi fatin dook mai tuir julgamentu tenke lakon tempu no osan. Ida-ne’e kontribui ba aumenta kazu sira iha Tribunál inklui viola ema-nia direitu liga ba asesu justisa,” nia esplika.
Luís hatutan, JSMP mós preokupa tanba iha Tribunál seidauk iha matadalan kona-ba oinsá atu guia juíz sira halo desizaun, tanba ne’e mak dalaruma mosu konfuzaun ba akordaun juíz iha públiku nune’e laiha desizaun ida justa no adekuada ba ema.
“Tanba ne’e, iha relatóriu JSMP ami husu Governu kontinua intensifika rekursu ba juíz sira nune’e bele korresponde ba servisu sira iha Tribunál, liuliu atendimentu julgamentu ba kazu sira, apoia infraestrutura no fasilidade,” nia konklui.
Jornalista: Natalino Costa
Editór: Xisto Freitas da Piedade
