Xefe Estadu-MJ diskute oinsá halo alargamentu ba resintu Palásiu Prezidensiál

DILI, 12 Maiu 2025 (TATOLI)–Ministru Justisa (MJ), Sergio Hornai, segunda (12 Maiu 2025) ne’e. hasoru malu ho Prezidente Repúblika José Ramos Horta hodi ko’alia kona-ba oinsá atu halo alargamentu ou halo luan tan resintu Palásiu Prezidensiál, iha Palásiu Prezidensiál Nicolau Lobato, Bairru Pité.
“Prezidente Repúblika mak bolu ha’u mai iha ne’e atu ko’alia kona-ba servisu Ministériu Justisa ninian liuliu kona-ba alargamentu sira-ne’ebé mai husi Prezidente rasik atu halo alargamentu ba terrenu sira-ne’ebé pertensia ba Palásiu Prezidensiál nian,” Ministru Sergio hateten ba jornalista sira hafoin ramata enkontru ho Xefe Estadu.
Nia dehan, antes ne’e Prezidente Repúblika planeia ona atu halo luan tan ezisténsia koridór Palásiu Prezidensiál.
“Ida-ne’e planeia ona, atu halo luan tan koridór Prezidente Repúblika ninian, liuliu ba iha kotuk, ba iha sorin tuir planu polítika ne’ebé define ona husi Prezidente Repúblika,” Ministru ne’e dehan.
Nia hatutan, Prezidente Horta fó mós orientasaun balun kona-ba oinsá atu haree servisu sira-ne’ebé antes ne’e Prezidente Repúblika halo ona ho parseiru internasionál sira liuliu kona-ba rai.
“Prezidente fó mós hanoin balu ba Ministériu Justisa mak oinsá atu haree akordu balun ne’ebé Prezidente rasik halo ona ho parseiru internasionál sira-ne’ebé atu hala’o atividade dezenvolvimentu balun. Maibé, Timor-Leste presiza halo viseversa troka ka haree ba rai sira-ne’ebé Estadu nian atu fó ba parseiru sira hala’o atividade sira ezemplu hanesan Abudai hakarak apoiu Timor-Leste hodi loke dormitóriu boot ba estudante timoroan sira. Ami simu no tau hanesan prioridade hodi haree ba oin oinsá bele hakat ba implementasaun,” nia hateten.
Jornalista : Hortencio Sanchez
Editór : Cancio Ximenes

