LIKISÁ, 13 Maiu 2025 (TATOLI) – Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) entrega ekipamentu metrolojia hamutuk item 11 ba Institutu Kualidade Timor-Leste (IQTL, iha portugés).
Inspetora-Jerál AIFAESA, Odete da Silva Viegas, hateten ekipamentu item 11 ne’e iha unidade 38 mak hanesan bejana litru 1.000, pezu padraun E2 ka anak timbangan massa standard class E2, Timbangan Bobot Ingsut (TBI) no seluk tan.
“Ida-ne’e ba ekipamentu kalibra ba sasukat nian, oinsá sukat ba volume kombustivel, bee, no kilógrama ka todan sira ne’e. Ida-ne’e tama iha serbisu metreolojia no padronizasaun nian”, Inspetora-Jerál AIFAESA, Odete Viegas, dehan iha Tibar ohin.
Tuir nia, atividade entrega ekipamentu husi AIFAESA ba IQTL ne’e importante, tanba atu reforsa serbisu instituisaun rua nian iha futuru.
AIFAESA hanesan institutu implementatór bá halo inspesaun, fiskalizsasaun no seluk tan no IQTL nu’udar instituisaun reguladora hodi halo polítika ba sertifikasaun produtu iha laboratóriu no halo kalibrasaun ba ekipamentu sira.
“Serbisu hamutuk entre AIFAESA no IQTL atu reforsa serbisu inspesaun, fiskalizasaun iha terrenu. Presiza iha baze legál sira ne’e, [ne’ebé] pertense iha IQTL atu la’o”, Odete Viegas salienta.
Nia afirma katak ekipamentu sira ne’e hola iha mandatu anteriór no sosa ho osan valor liu millaun, tanba sasán sira ne’e tuir padraun metrolójia internasionál nian.
Iha fatin hanesan, Prezidente IQTL, Izilda Manuela, agradese ba AIFAESA ne’ebé entrega ekipamentu meteorolójia nian ba IQTL.
Instituisaun rua ne’e halo knaar bazeia ba dekretu-lei númeru 10/2018, 09 Abríl, ne’ebé hetan alterasaun dahuluk husi dekretu-lei númeru 15/2021, 15 Setembru, ne’ebé ko’alia kona-ba papél no responsabilidade IQTL nian, nomós halo referénsia ba dekretu-lei númeru 20/2023, 12 Abríl, kona-ba Sistema Unidade Medida Legál no dekretu-lei númeru 40/2023, 31 Maiu, kona-ba Rejime Jerál Metrolójiku Legál.
Sasán sira ne’ebé entrega ba IQTL seidauk bele utiliza iha tinan ne’e no sei hein diskusaun Orsamentu Jerál Estadu 2026 nian ne’ebé sei prevee ba IQTL, nune’e sei kalibra ka teste fali ekipamentu sira ne’e tanba kondisaun rai kle’ur ona.
Jornalista: Arminda Fonseca
Editora: Maria Auxiliadora
