DILI, 14 Maiu 2025 (TATOLI)—Prezidente Repúblika (PR), José Ramos Horta, hateten Governu liuhusi Ministériu Justisa submete ona lista ba Prezidente Repúblika ligadu ho prizioneiru sira-ne’ebé mak atu hetan indultu iha ámbitu komemorasaun Loron Restaurasaun Independénsia RDTL ba dala XXIII, 20 Maiu, tinan ne’e.
Xefe Estadu hateten, provavelmente tuir lista ne’ebé mak Governu submete ba Prezidente Repúblika iha ema na’in-30 resin mak atu hetan indultu.
“Ha’u rona ema na’in-30 resin mak atu hetan indultu,” Horta hateten ba jornlista sira hafoin partisipa serimónia aniversária ezisténsia Polísia Sientífika Investigasaun Kriminál (PCIC-sigla portugés) ba dala XI ne’ebé hala’o iha salaun Multiozu Bebora, kuarta ne’e.
Konfirma kona-ba lista hirak-ne’e inklui mós Padre Richard Dascbach, Xefe Estadu Horta, hatán seidauk haree detallu kona-ba lista ne’e katak inklui mós Amu Richard Dascbach ka lae.
“Tanba ne’e ha’u seidauk hatene didi’ak kona-ba relatóriu ne’ebé mai husi Governu. Tanba ne’e, ha’u labele komenta sé mak iha lista ne’e. Ha’u lahatene se informasaun ne’e dehan katak Padre Amerikanu ne’e mós prevista iha lista ne’e ka lae tanba ha’u seidauk haree lista ne’e,” nia haktuir.
Nia fundamenta katak molok atu fó indultu ba prizioneiru sira-ne’e sei ko’alia ho sosiedade sivíl no Provedór Direitu Umanu no Justisa.
Jornalista: Natalino Costa
Editór: Xisto Freitas da Piedade
