KOVALIMA, 14 Maiu 2025 (TATOLI) – Leonel Andreas Messi Maria Amaral, alunu ida iha munisípiu Kovalima sofre agresaun fízika ka hetan baku husi manorin-na’in to’o interna ka baixa iha sala-emerjénsia no tau soru ida iha ospitál. Nune’e, aman husi Leonel Messi, Angelo Amaral lamenta ho aktu manorin-na’in ho naran inisiál BC iha Eskola Sekundáriu Públiku (ESP), Suai.
Kronolojia, vítima alunu Leonel Andreas Messi Maria Amaral konta, profesór baku nia razaun la kumpri regra eskola hanesan, la uza farda no mane sira halo fuuk-naruk tanba molok ne’e manorin sira aviza tiha ona.
“Ho nune’e iha loron 13 Maiu ne’e, ami na’in haat mak viola regra eskola hanesan balun la uza farda no balun halo fuuk-naruk. Hanesan kolega feto na’in rua la iza uniforme eskola. Ha’u ho ha’u-nia kolega fuuk naruk. Ha’u-nia kolega manorin ne’e dada de’it nia fuuk dala ida maibé ha’u, nia baku ha’u-nia kanuruk dala tolu”, Leonel Andreas Messi Maria Amaral informa ba TATOLI, iha nia rezidénsia Kamnasa, ohin.
Alunu ne’e esplika katak, hafoin profesór ko’alia hala’o enkontru atu hasai alunu referidu tanba alunu ne’e nia inan-aman hasai lia fuan ladun di’ak ba manorin sira iha Eskola Sekundáriu Jerál Públiku, Suai, nune’e manorin ne’e dehan matéria saida de’it mak alunu ne’e lahatene manorin hakarak baku hela de’it.
Alunu Leonel hanesan mós membru estudantil iha parte komunikasaun, hafoin hetan baku husi manorin-na’in, nia sente ulun moras hodi dudu meza no kadeira sai husi janela hodi la’o sai ba iha auto-estrada para motor hodi husu ajuda atu tula nia fila ba uma.
“Ha’u to’o estrada husu ajuda ha’u-nia kolega mak tula ha’u hatun ha’u iha ha’u-nia maun nia servisu fatin iha Rádiu Komunidade Kova Taroman. Ha’u-nia maun haree ha’u-nia oin halai atu muta no ha’u maun lori ba ospitál no baixa iha sala emerjénsia tau soru ida no dadaun ne’e ha’u alta ona hodi hamutuk fali ha’u-nia inan-aman maibé kondisaun atu muta hela de’it”, nia konta.
Ho akontesimentu ne’e, Aman husi alunu, Angelo Amaral, lamenta no hirus profesór bainhira baku nia oan nia kanuruk no kauza to’o interna iha iha sala emerjénsia hodi tau soru ida iha ospitál Suai.
“Inan-aman ne’ebé mak la hirus bainhira profesór baku ha’u-nia oan nia kanuruk entaun ha’u ba trata duni profesór ne’ebé baku iha nia oan nia otak kecil. Bazeia ba rezultadu husi ezaminiasaun, ha’u husu dotor atu halo esplikasaun katak ha’u-nia oan nia kakutak normál”, nia dehan.
Bazeia ba rezultadu ezaminasaun alunu ne’e normál maibé iha efeitu tanba alunu Leonel Messi halo nia oin halai no muta relasiona ho profesór baku nia kanuruk dala tolu maske kakutak normál hela maibé nia efeitu mak nia oan atu muta hela de’it.
“Profesór sira dehan la baku maibé dudu de’it ne’e deklarasaun profesór sira, tanba ne’e ita labele husik de’it profesór hanesan ne’e. Ita husik de’it ohin bele halo ba ha’u-nia oan maibé iha futuru nia halo ba ema seluk. Ha’u laran moras baku ha’u-nia oan nia kanuruk iha uma ha’u nunka baku ha’u-nia oan nia kanuruk”, nia kompara.
Ho aktu Manorin-na’in ne’e hanesan aman kazu ne’e lori ba iha dalan legál nune’e bele foti desizaun ida oinsá hakarak dame ka halo nusa mak pois mak bele rona nia rezultadu.
Relasiona ba problema ne’e, Diretór Eskola Sekundáriu Jerál Públika, Suai, Fernando Ferreira klarifika, bazeia ba avizu iha semena kotuk alunu hotu liliu ba mane sira tenke tesi fuuk. Nia profesór ne’e relata, dudu alunu Leonel Messi nia kanuruk dala tolu.
“Iha momentu ne’e ha’u rasik la iha fatin tanba partisipa hela seremónia promosaun diviza ba PNTL. Bazeia ba profesór ne’ebé deklara katak dudu alunu referida nia kanuruk dala tolu hafoin alunu referidu ba iha ospitál bainhira ha’u simu kontaktu husi alunu nia apa profesór baku nia oan nia kanuruk dala tolu”, diretór ne’e konta tuir.
Hafoin simu informasasaun, hanesan dirijente eskola kontaktu direta ba adjunta maibé adjunta rasik la hatene problema ne’e no nia parte oriente ba adjunta atu haree alunu iha sala-de-aula maibé alunu la iha ona.
“Alunu ne’e sai la’ós liuhusi portaun maibé liuhusi Janela nune’e dever hanesan diretór hodi vizita direita alunu iha ne’e ospitál no alunu ne’e baixa no médiku sira hasai ezeminasaun nia kondisaun di’ak hela”, nia dehan.
Ezekutivu estabelesimentu ensinu ne’e rekoñese, alunu ne’e interna iha ospitál Suai no nia rasik hamutuk ho diretora edukasaun Kovalima ba vizita direta atu haree alunu ne’e nia kondisaun sente oin halai presiza atu deskansa.
Diretora Servisu Munsipál Edukasaun Kovalima, Elda de Fatima esplika,kona-ba nia prezensa iha ospitál tanba Ministra Edukasaun mak delega no nia rasik haree alunu interna iha ospital hodi haree nia kondisaun.
“Los, alunu ne’e baixa sala-emerjénsia iha ospitál Suai. Bainhira inan-aman hakarak atu lori kazu ne’e ba oin ida-ne’e ema nia direitu maibé ami iha superintende atu halo inspesaun no sira ba ona halo investigasaun”nia hateten.
Jornalista:Celestina Teles
Editór: Rafael Ximenes de A. Belo
