DILI, 14 Maiu 2025 (TATOLI)–Prezidente Repúblika, José Ramos Horta, kuarta ne’e, fó pose ba Karlito Nunes nu’udar Embaixadór Estraordináriu no Plenipotentiáriu dahuluk Timor-Leste ba Repúblika Índia, iha Palásiu Prezidensiál Nicolau Lobato, Bairru Pite, Dili.
“Nomeasaun Embaixadór Karlito Nunes marka etapa importante ida iha ita-nia relasaun diplomátika ho Índia, Embaixadór Nunes lori esperiénsia, vizaun no dedikasaun ne’ebé presiza hodi hametin lasu entre nasaun sira. Bainhira Timor-Leste kontinua nia viajen ba integrasaun rejionál no dezenvolvimentu ekonómiku ne’ebé boot-liu, ita-nia parseria ho Índia reprezenta ida husi ita-nia relasaun diplomátika ne’ebé promete liu,” Xefe Estadu ne’e hateten iha nia diskursu.
Timor-Leste no India mantein relasaun bilaterál ne’ebé forte dezde estabelese relasaun diplomátika iha iha 24 Janeiru tinan 2003, kolabora iha setór defeza, edukasaun, saúde, agrikultura no kulturál.
Relasaun sai metin liután iha 2024, marka ho partisipasaun Prezidente Ramos Horta iha Simeira Globál Vibrante Gujarat iha fulan-Janeiru, iha ne’ebé Prezidente hasoru malu ho Primeiru-Ministru Modi hodi diskute kooperasaun iha petróleu, gás, dijitalizasaun no interkâmbiu edukasionál.
Horta hatutan, momentu diplomátiku ida-ne’e kontinua ho vizita Estadu istóriku dahuluk husi Prezidente Índia nian mai Timor-Leste iha fulan-Agostu 2024, tuir ho nasaun rua estabelese misaun diplomátika permanente. Timor-Leste loke nia embaixada iha New Delhi iha fulan-Outubru tinan 2024 no Índia estabelese nia embaixada iha Dili iha fulan-Setembru tinan 2024, hatudu sira-nia kompromisu ba malu atu hametin liután relasaun bilaterál no apoia Timor-Leste nia envolvimentu ho ASEAN.
Prezidente fiar katak nomeasaun Embaixadór Karlito Nunes sei eleva no hametin liután lasu amizade no kooperasaun entre nasaun rua ne’e, no halo ligasaun Dili-Delhi sai metin liután.
Embaixadór Nunes ema ida-ne’ebé iha esperiénsia barak ba nia kna’ar, antes ne’e, hala’o kna’ar nu’udár Asesór iha Unidade Servisu Relasaun Internasionál iha Gabinete Prezidénsia (2024-2025) no nu’udar Embaixadór Estraordináriu no Plenipotentiáriu ba da-lima ba Nasaun Unida (2021-2024),
Embaixadór Karlito Nunes dedika ona nia karreira hodi avansa interese Timor-Leste nian iha palku globál.
Ninia esperiénsia profisionál inklui servisu distintu ho organizasaun internasionál importante sira, inklui tinan 20 ho Institutu Republikanu Internasionál-IRI (iha-ne’ebé nia simu Prémiu Judy Van Rest), Institutu Demokrátiku Nasionál, Organizasaun Internasionál ba Migrasaun no Misaun Nasoaun Unida niann iha Timór-Leste.
Jornalista : Hortencio Sanchez
Editór : Cancio Ximenes
