DILI, 15 Maiu 2025 (TATOLI)—Asosiasaun Kafé Timor (ACT-sigla portugés) halo promosaun ba produtu kafé Timor iha World of Coffee Expo, iha Jakarta, Indonézia, hahú husi loron 15-17 Maiu, tinan ne’e.
Prezidente ACT, Daniel Leong, hateten ACT hetan apoiu husi fasilidade Dezenvolvimentu Merkadu ka Market Development Facility (MDF) no Embaixada Austrália, nune’e organiza feira no kompetisaun iha tinan 2024. Hafoin ne’e, parseiru ne’e oferese prémiu viajen ba Jakarta hodi partisipa iha Expo referidu.
“Ami hakarak fahe ho eventu partisipante sira hodi koko ami nia kafé. Ami hakarak aprezenta amostra kafé ba importadór sira. Eventu ne’e ajuda ami promove istória ita-nia kafé no ita-nia rai ba ema sira-ne’ebé hakarak vizita no buka orijen no marka kafé Timor nian,” Prezidente ACT dehan ba TATOLI, Via Whatshapp, kinta ne’e.
Nia esplika katak partisipasaun membru ACT iha expo ne’e ho objetivu atu promove produtu kafé no istória orijen no nasaun iha rai-li’ur. Tanba ACT iha kompromisu atu fó apoiu ba nia membru sira hodi esplora oportunidade iha merkadu rai-laran no rai-li’ur.
“Ami aprezenta hela kafé ne’ebé di’akliu iha kompetisaun 2024. Ami iha grupu vensedór rua ne’ebé partisipa hela iha World of Coffee Expo, Jakarta-Indonézia. Sira aprezenta kafé faze husi kooperativa Cocomau no barista profisionál husi Kompañia Orijem Timor,” nia dehan.
Daniel Leong mós mensiona katak ACT mós halo promosaun ba produtu kafé husi kompañia Mara Mresa no Timor Hayday Ar Coffee iha World of Coffee Expo iha Jakarta.
Tuir prezidente ne’e, eventu ne’e hetan partisipasaun hosi barista no peritu kafé hosi nasaun oinoin ne’ebé bele fó oportunidade hodi aprende kona-ba kafé Timor. Pájina ofisiál Fasilidade Dezenvolvimentu Merkadu nian relata katak MDF haksolok atu apoia ACT hodi partisipa iha eventu Loron Mundiál Kafé nian iha Jakarta-Indonézia.
Jornalista: Felicidade Ximenes
Editór: Xisto Freitas da Piedade
