Xefe Estadu-MAE diskute preparativu ba komemorasaun 20 Maiu

DILI, 15 Maiu 2025 (TATOLI)—Prezidente Repúblika, José Ramos Horta, hasoru malu ho Ministru Administrasaun Estatál (MAE) Tomás Cabral, hodi ko’alia kona-ba preparasaun ba komemorasaun loron restaurasaun independénsia 20 Maiu ba da-23 ne’ebé sei realiza iha Palásiu Prezidensiál Nicolau Lobato, Bairru Pite, Dili.

Notísia Relevante: Governu aprova tema jerál “Hametin Pás no Dezenvolvimentu” ba komemorasaun 20 Maiu

Iha komemorasaun ne’e, sei realiza Espozisaun Nasionál, ne’ebé hahú loke iha 15 fulan-Maiu iha Tasi-Tolu no Portu Dili, destaka nu’udar oportunidade xave ida ba munisipiu sira atu aprezenta sira-nia progresu iha prestasaun servisu, inovasaun lokál sira no rikusoin kulturál inklui tradisaun kulinária lokál sira.

Valór hosi plataforma ida-ne’e hodi hatudu rezultadu tanjível sira husi esforsu administrativu lokál sira no hodi permite sidadaun sira atu envolve diretamente ho serbisu husi sira-nia munisípiu sira.

Selebrasaun loron 20 Maiu sei sai nu’udar eventu prinsipál ho serimónia espesiál hasa’e bandeira iha Palásiu Prezidensiál.

Ministru Administrasaun Estatál (MAE), Tomas Cabral hateten, Governu prepara ona orsamentu ba loron nasionál importante sira iha tinan 2025.

“Orsamentu sira-ne’e inklui eventu sira iha loron 30 fulan-Agostu, loron 31 fulan-Dezembru, no mós sei kobre mark tinan 50 dezde anúnsiu independente importante iha loron 28 fulan-Novembru,” Ministru Tomas Cabral hateten iha Palásiu Prezidensiál Dili, kuarta (14 Maiu 2025) horisehik.

Tuir espetativa, sei konvida ema importante sira iha Timor-Leste no bainaka importante sira husi nasaun seluk, no hein katak ema barak husi públiku sei hamutuk iha selebrasaun sira.

Entretantu, antes ne’e Governu aprova ona tema jerál ba komemorasaun 20 de Maiu tinan ne’e mak “Hametin pás no dezenvolvimentu”.

Tuir dadus ne’ebé iha orsamentu ne’ebé MAE koloka ba Munisípiu sira hodi komemora loron nasionál ne’e kada Muinisípiu hetan rihun $7 hodi gasta ba atividade durante loron lima hahú 15-20 maiu no atividade feira nasionál.

Enkuantu, orsamentu total hodi komemora loron nasionál 20 de Maiu hamutuk rihun $500.

Enkontru ne’e inklui mós atualizasaun kona-ba asuntu importante sira Governasaun nian, ho Ministru Tomas Cabral fó informasaun ba Prezidente kona-ba estatutu prosesu auditoria nian kona-ba Ajénsia Bee Potável no Saneamentu (PAM), asuntu ida-ne’ebé Prezidente Ramos Horta nota hanesan krusiál ba responsabilizasaun.

Konklui enkontru ne’e, Prezidente Ramos Horta haktuir hikas katak eventu nasionál sira-ne’e nu’udár reflesaun vitál ba Timor-Leste nia jornada no espíritu koletivu no Prezidente hein eventu hirak ne’e nia susesu.

Notísia Relevante: Espozisaun 20 Maiu: Kada munisípiu aprezenta progresu serbisu no produtu lokál

Jornalista : Hortencio Sanchez

Editór        : Cancio Ximenes