DILI, 18 Maiu 2025 (TATOLI)—Crosser Indonézia, Muhamad Zidane, sai manán-na’in iha Klase Open Internasionál, iha finál Eventu Internasionál Motocross, iha Dolokoan, Kristu-Rei, domingu ne’e.
Muhamada hateten katak nia sente kontente tanba foin primeiravéz mai kompete iha Timor-Leste, maibé bele sai vensedór.
“Ha’u sai manán-na’in iha-ne’e no hatudu buat ne’ebé di’ak ba ekipa,” crosser estranjeiru ne’e informa ba jornalista sira.
Nia haktuir, kompetitór sira mesak esperiente de’it liuliu Lewis husi Austrália tanba iha Indonézia sira sempre kompete hamutuk, iha-ne’ebé dalaruma sira-nia performance ne’e balansu, maibé agradese nia bele sai manán-na’in iha Lewis nia oin.
Notísia relevante: FMCTL realiza eventu internasionál motocross, komemora Loron Restaurasaun Independénsia
Enkuantu, crosser husi grupu Zefra Racing Team, Nesta Bento, ne’ebé sai hanesan terseiru lugár iha klase 200cc 4 Tak, dehan xave susesu ne’ebé nia iha mak tenke sai crosser ne’ebé disiplinadu no kuidadu-aan hodibele treinu iha arena inklui tenke aprende husi ema ne’ebé iha esperiénsia di’akliu nune’e bele foti ezemplu husi ne’ebá.
“Mundu motocross ne’e lataka dalan ba ema. Sé mak hakarak hatudu ninia talentu bele mai iha ne’e para ita kompete hamutuk, tanba nakar iha motór mai iha arena, la’ós nakar iha estrada públiku,” nia enkoraja.
Nia agradese ba komisaun organizadora ne’ebé realiza eventu ida-ne’e, nune’e sira bele iha preparasaun ne’ebé di’ak bainhira kompete iha nível internasionál.
Aleinde ne’e, crosser husi grupu Shell Monteiro Brother Team, Chelin Valentina, ne’ebé hanesan crosser feto iha Timor-Leste, hateten maski la manán maibé nafatin agradese tanba bele kompete hanesan feto ida hodi sikat leet iha mane sira.
“Ha’u husu feto maluk sira karik iha talentu ba motocross mai ita kompete iha arena hodi hatudu ita-nia talentu. Labele hatudu iha estrada públiku hodi hamosu asidente tráfegu,” crosser ne’e rekomenda.
Iha fatin hanesan, adeptu Dahlio Sousa dehan bainhira nia ba asiste kompetisaun motocross, nia prefere liu iha Klase Open Internasionál tanba la’ós timoroan de’it mak kompete maibé ema husi nasaun seluk mós mai kompete.
“Ha’u sente rame ne’e mak iha Klase Open Internasionál tanba crosser sira halai la fó frakeza no la sura pontu entaun sé mak lais nia mak sai kampiaun,” nia tenik.
Entretantu, manán-na’in ba Klase Espesiál Engine 85cc mak Juvencio Freitas, manán-na’in ba Klase Standart 155cc (pemula), António Sarmento, manán na’in ba Klase Espesiál Engine 125/250cc grade (A), Long Monteiro, manán-na’in ba Klase Espesiál Engine 125/250cc grade (B), Ako Plur, manán-na’in ba Klase 200cc Sport, Jeqy Mesquita, manán-na’in ba Klase Standart 155cc (Senior), Cedric, manán-na’in ba Klase 200cc 4 Tak, Ano Pereira, manán-na’in ba Klase SE 85cc Super, Alex Freitas, manán-na’in ba Klase FFA 200/250cc, Danilo Tilman, manán-na’in ba Klase Juvenil, Esteven Aprilio, manán-na’in ba Klase ex Crosser, Obot Fame, no manán-na’in ba Klase Espesiál Engine Open Internasionál, Muhamad Zidane.
Eventu ne’e hala’o durante loron rua (17-18 Maiu), organizadu husi Federasaun Motorsiklizmu Timor-Leste (FMCTL-sigla portugés), ho objetivu atu selebra Loron Restaurasaun Independénsia RDTL ba dala XXIII, 20 Maiu 2025.
Jornalista: Alexandra da Costa
Editór: Xisto Freitas da Piedade
