DILI, 19 Maiu 2025 (TATOLI)–Sekretáriu Estadu Komunikasaun Sosiál, Expedito Loro Dias Ximenes, akompañada husi Embaixadora Portugal iha Dili, Maria Fernandes Manuela Bairros, segunda ne’e, atribui sertifikadu ba formadu na’in-49 ne’ebé durante ne’e konklui ona formasaun língua portugeza, iha Sentru Língua ba Jornalista (CLJ-sigla portugeza).
“IX Governu konstitusionál durante ne’e serbisu hamutuk ho Instituto Camões fó formasaun ba jornalista sira oinsá atubele ko’alia no hakerek ba iha órgaun komunikasaun sosiál sira. Ohin, ha’u mai asiste hamutuk ho Embaixadora Portugal iha-ne’e atu entrega sertifikadu ba sira-ne’ebé iha nível oin-oin hanesan A1, A2, B1, B2 no B2+,” Expedito hateten ba jornalista iha Sentru Kulturál Embaixada Portugal, Dili.
Governante ne’e dehan, Governu liuhusi Sekretaria Estadu Komunikasaun Sosiál (SEKOMS) hamutuk ho Embaixada Portugal sei kontinua asina programa ne’e ba faze datoluk nian nune’e fó formasaun ba jornalista sira.
Expedito hateten, iha terseira faze sei foku ba jornalista ne’ebé audivizuál no mós ba imprensa sira hanesan online, no planu ne’e Embaixadadora Portugal aseita ona atu halo akordu formasaun ba terseira faze nian iha tempu badak.
Iha biban ne’e, Governante ne’e mós esklarese, tinan ne’e, SEKOMS planeia atu haruka jornalista na’in-haat ba kontinua formasaun iha Centro Portocolar de Formação Profissional para Jornalistas (CENJOR), Lisboa, Portugal.
Iha fatin hanesan, Embaixadora Portugal iha Dili, Maria Fernandes Manuela Bairros, hateten Projetu Konsulóriu Lian ba Jornalista ne’e tinan oin kompleta ona tinan sanulu liuhusi kooperasaun Governu Timor-Leste ho Instituto Camões hodi fó formasaun ba jornalista sira no funsionáriu husi instituisaun oinoin.
“Hanesan ita hatene, forma kooperasaun sira-ne’e mak atu konsolida liután lian Portugés iha Timor-Leste liuliu iha área komunikasaun sosiál. Projetu ida-ne’e sei avansa ba faze datoluk,” nia afirma.
Iha fatin hanesan, Formanda Yane Alfrida Domingas Maia, informa nia parte konklui ona kursu CLJ husi nível A1, A2, B1, B2, B2± inklui jornalizmu saúde, edukasaun, ambiente no iha área ekonomia.
“Agora, ha’u hetan oportunidade hanesan revizora ida-ne’e lori ha’u tenke estuda no aprende no buka aprende liu hodi estuda vokabuláriu, nune’e bele halo revizasaun ba notísia ho kualidade iha ha’u-nia nia serbisu,” nia haktuir.
Nia dehan importánsia husi formasaun ne’e mak aumenta kapasidade jornalista atu jornalista sira bele hakerek ho di’ak no iha hanoin krítika atu análize dokumentu ne’ebé iha.
Nune’e mós, formanda Domingas da Silva Gonçalves, sente kontente tebes tuir formasaun iha Sentru Língua ba Jornalista tanba Portugés ne’e nu’udár língua ofisiál.
“Ha’u hanesan jornalista iha mídia demokrasia sente kontente, maski iha dezafiu iha formasaun maibé ne’e la’ós impende espíritu atu atende,” nia tenik.
Nia husu SEKOMS no CLJ atu kontinua formasaun ida-ne’e tanba jornalista barak presiza hasa’e sira-nia koñesimentu iha área língua nian.
Jornalista: Natalino Costa
Editór: Xisto Freitas da Piedade
