DILI, 21 Maiu 2025 (TATOI)–Konstrusaun infraestrutura iha eskola Ensinu Sekundáriu Tékniku Vokasionál (ESTV), Ensinu Sekundáriu Jerál (ESJ) no Ensinu Báziku (EB) iha Ainaru falta sala laboratóriu.
“Kontrusaun foun ba ensinu sekundáriu ida ho saladeaula neen no konstrusaun ba eskola bázika rua ho nia saladeaula tolu ne’e ninia progresu atinje ona 90%. Falta sala laboratóriu no iha hela instalasaun eletrisidade,” Diretór Servisu Edukasaun Munisípiu Ainaru, Patrício da Costa Magno, informa ba Agência Tatoli, via telefónika, kuarta ne’e.
Osan ba konstrusaun infraestrutura iha ensinu báziku rua ne’e hamutuk $80.000 no ESTV $94.951.
Notísia relevante : ME aloka osan konsesaun eskolár ba ESTV iha territóriu
ESTV Públiku iha Ainaru iha tolu ho nia totál estudante 455 no ESJ iha haat ho totál estudante 1.723, Ensinu Sekundária Katólika lima ho estudante 1.434, Ensinu Báziku iha 88 ho totál estudante 8.898, Ensinu Báziku Katólika 5 totál estudante 885, Pre-eskolár Públika 45 totál estudante 1.797, Pre-eskolár Katólika lima totál estudante 157.
“Ita-nia manorin ne’ebé hanorin iha nível eskolaridade iha munisípiu Ainaru hamutuk 1.074, manorin ba Ensinu Báziku 54, Ensinu Báziku 900, Ensinu Sekundáriu Jerál 86 no ESTV iha 34,” Diretór tenik.
Jornalista : Osória Marques
Editora : Julia Chatarina
