DILI, 26 Maiu 2025 (TATOLI)—Inspesaun Jerál Jogu (IGJ, sigla portugés) iha Ministériu Turizmu no Ambiente (MKI) arrekada reseita $1.262.853,53 ba kofre Estadu, durante fulan-Janeiru to’o Abríl tinan ne’e.
“Reseita millaun $1 resin mak hanesan reseita bruta $67.324.345,96, reseita prémiu $62.8021.437,06, reseita líkida $4.522.085,26, impostu $580.051,19, Cont sosiál $682,802.53,” Anibal Martins, hateten iha ninia knaar-fatin Bebora, Segunda ne’e.
IGJ rekolla taxa liuhusi kontrola jogu sira hanesan toto bola, slot machine, jogu online no sorteiu sira.
Notísia relevante : Janeiru-Fevereiru, IGJ arrekada reseita liu rihun $600 ba kofre Estadu
Inspetór-Jerál subliña, ekipa IGJ kontrola jogu sira no rekolla taxa ho manuál, tanba ne’e sira hakarak kria sistema dijitál ba rekollamentu taxa iha futuru.
“Ami-nia funsionáriu sira rekolla taxa ho manuál de’it, entaun ami sei estabelese sistema dijitalizasaun ne’e atu monitoriza iha futuru tanba tipu jogu sira-ne’e iha lisensa,” Anibal katak.
Antes ne’e, iha tinan 2024, MTA liuhusi Inspesaun Jerál Jogu arrekada reseita husi jogu lísitu no jogu tradisionál bola guling hamutuk $3.917.821, 91 ba kofre Estadu kompara ho $3.723.446,70 iha tinan 2023.
Jornalista : Arminda Fonseca
Editora : Julia Chatarina
