DILI, 23 Maiu 2025 (TATOLI)—Sekretáriu Estadu Formasaun Profisionál no Empregu, Rogério de Araújo Mendonça, hateten pozisaun Governu nafatin firme tau importánsia ba iha saláriu mínimu ba traballadór sira iha Timor-Leste.
“Pozisaun hanesan Governu ami firme tau importánsia ba saláriu mínimu. Ami hamutuk ho Konsellu Nasionál Traballadór lori ona proposta lei ida-ne’e bá konsellu Ministru, maibé bainhira diskusaun iha Konsellu Ministru, iha-ne’ebá husu filafali mai ami atu halo konsultasaun públika ba iha entidade sira-ne’ebé mak responsabiliza hodi kontrola merkadu sira-ne’e. Se ita hasa’e saláriu mínimu $150 ba traballadór, mak empregadaór sira uza oportunidade hodibele hasa’e presu iha merkadu, tanba ne’e ita tenke kuidadu,” nia dehan ba jornalista sira, iha nia kna’ar fatin, sesta ne’e.
Notísia relevante: MCAE sei aprezenta hikas Ezbosu Lei Saláriu Mínimu ba KM
Nia afirma, kompromisu ne’ebé mak SEFOPE halo ne’e tarde liu iha tinan 2026, maibé sedu liu iha 2025 atu lori filafali lei ida-ne’e ba Konsellu Ministru atubele altera saláriu mínimu bá $150.
Antes ne’e, Vise Primeiru-Ministru no Ministru Koordenadór Asuntu Sosiál, Mariano Assanami Sabino, hateten SEFOPE hatama ona revizaun saláriu mínimu ba Konsellu Ministru no Governu konsege debate ona kona-ba oinsá hasa’e saláriu, maibé husi parte ministériu setorál sira-ne’ebé liga ho ida-ne’e mak sei haree hodi diskute filafali.
Jornalista: Felicidade Ximenes
Editór: Xisto Freitas da Piedade
