DILI, 28 Maiu 2025 (TATOLI)—Advogadu Fujitivu Arnolfo Teves Jr, José Ximenes, husu ba nia kliente atu ho laran luak simu desizaun Governu Timor-Leste ne’ebé sei deporta nia bá nia nasaun orijen, Filipina.
“Ita-boot sira hatene katak hanesan advogadu Teves ninian, ami manán kazu ne’e ba faze hotu-hotu ba tránzitu ein-julgadu. Maibé, ba kestaun atu deporta ami-nia kliente ne’e, puramente polítiku no laiha fundamentu legál. Ha’u dehan ba ha’u-nia kliente katak ida-ne’e mak senáriu ne’ebé aat liu, tan ne’e ita tenke simu. Agora, prosesu laiha ona,” José hateten ba jornalista sira iha Ministériu Interiór, Vila Verde, kuarta ne’e.
Nia dehan aviaun ne’ebé atu tula fila Arnolfo Teves oras ne’e iha dalan ona no kompleta ho sela detensaun ba Arnolfo.
Notísia relevante: Autoridade seguransa kaptura ona Arnolfo Teves no ohin sei deporta ba nia rai orijen
Iha biban ne’e, José haktuir katak ninia kliente triste ba desiaun ne’e. “Ha’u-nia kliente triste. Nia mai iha Timor sé mak haruka ema ba simu nia iha aeroportu?,” nia kestiona.
José rekoñese katak to’o agora laiha karta pedidu ida formál husi Governu Filipina atu halo deportasaun ba Arnolfo Teves Jr.
Nia hateten detensaun ne’ebé mak autoridade seguransa halo ba Arnolfo Teves ne’e nu’udár detensaun ilegál, tanba ne’e sei aprezenta pedidu protestu hodi kontesta atu autoridade seguransa nian hasoru nia kliente tanba konsideradu habeas corpos.
Advogadu ne’e mós lamenta tanba durante ne’e Ministériu Interiór liuhusi Servisu Migrasaun, Primeiru-Ministru inklui Komandante Jerál PNTL la aseita pedidu kontestasaun ba deportasaun.
“Ami-nia karta ne’e ami dirije ba Servisu Migrasaun, Ministru Interiór, Primeiru-Ministru no Komandante Jerál PNTL, maibé laiha resposta. Ha’u atu bá vizita ha’u-nia kliente más la hetan autorizasaun husi Ministru Interiór,” eis-Prokuradór Jerál Repúblika ne’e tenik.
José hateten, kuandu Arnolfo fila bá nia nasaun orijen mak akontese buat ruma ba nia, Estadu Timor-Leste tenke responsabliza nia atu perante mundu internasionál tanba Timor-Leste ratifika Konvensaun ba Direitu Umanu.
Jornalista: Natalino Costa
Editór: Xisto Freitas da Piedade
