DILI, 28 Maiu 2025 (TATOLI)—Sekretaria Estadu Formasaun Profisionál no Empregu (SEFOPE) hamutuk ho Dili Development Company (DDC) Timor Plaza, kuarta ne’e, asina nota entendimentu (MoU) atu promove kriasaun empregu ba timoroan sira iha rai-laran.
“Apresia ba Dili Development Company, Lda, ne’ebé mak iha kompromisu atu servisu hamutuk ho ami hodi promove kriasaun empregu ba ita-nia joven sira iha rai-laran,” Sekretáriu Estadu Formasaun Profisionál no Empregu, Rogério de Araújo Mendonça, dehan iha ámbitu programa lansamentu estájiu profisionál rai-laran entre entidade promotora no benefisiáriu sira, iha salaun SENAI, Bekora.
Nia hateten, tinan barak SEFOPE organiza estájiu profisionál iha de’it rai-laran, maibé nunka espande ba rai-li’ur.
“Maibé, iha tinan ida-ne’e ita aumenta estájiu profisionál ba iha rai estranjeiru liuhusi servisu hamutuk ho Dili Development Company hodi haruka estajiadu sira bá tuir formasaun durante fulan neen iha Jogja, Indonézia, hodibele hasa’e abilidade, kompeténsia no koñesimentu,” Rogério informa.
Nia esplika, área importante sira-ne’ebé estajiáriu sira sei aprende mak hanesan formasaun ba forklip, formasaun ba from office management, formasaun eletrisidade no formasaun ba lift.
Iha fatin hanesan, Jerente Empreza Dili Development Company Timor Plaza, Jeremy Lung, hateten edukasaun no formasaun mak dalan atu asegura futuru ida-ne’ebé prósperu ba ema hotu.
“Estudante selesionadu na’in-ualu ne’e sei bá rai estranjeiru hodi kontinua sira-nia edukasaun no abilidade sira-ne’ebé iha, sira lori ho sira esperansa, sira-nia família nia mehi no komunidade no futuru,” Jeremy Lung konklui.
Jornalista: Felicidade Ximenes
Editór: Xisto Freitas da Piedade
