Komandu PNTL detein suspeitu na’in-haat ne’ebé suspeitadu ba produsaun kupaun SDSB ho ilegál

DILI, 01 Juñu 2025 (TATOLI)—Komandu Polísia Nasionál Timor-Leste (PNTL) Munisípiu Dili, detein suspeitu na’in-haat tanba suspeitadu ba produsaun kupaun SDSB ho ilegalmente.
Suspeitu sira-ne’ebé polísia detein mak ho inisiál S, A, FFS no BMF.
Suspeitu na’in-haat ekipa konjunta Servisu Informasaun Polísia (SIP), Servisu Nasionál Intelejénsia (SNI), Servisu Sekretu FALINTIL-Forsa Defeza Timor-Leste (J2) deteta iha domingu (01/06).
Suspeitu sira ekipa konjunta kaptura iha Tasi Tolu bainhira halo hela atividade fa’an kupaun ilegál ne’e ba sidadaun sira iha área Tasi Tolu, Suku Komoro, Postu Administrativu Dom Aleixo, Munisípiu Dili.
“Ita konsege deteta sira, depois halo kapturasaun ba sira. Agora daudaun halo ona prosesu no suspeitu sira detein ona iha sela detensaun oras 72 nia laran hodi aprezenta bá Ministériu Públiku hodi prosesa bá primeira interrogatória,” Komandante Polísia Munisípiu Dili, Superintendente Xefe Polísia Orlando Gomes, hateten ba jornalista sira iha nia kna’ar fatin, Kaikoli, segunda ne’e.
Nia dehan, kupaun SDSB ne’ebé mak suspeitu sira prodús ho ilegalmente ne’e sira kópia tutan kupaun SDSB husi Amizade ninian no mós hosi Badford.
Superintendente Xefe Polísia Orlando informa katak Komandu PNTL kontinua halo identifikasaun ba suspeitu sira hodi hatene loloos atividade produsaun kupaun ne’e sira halo kle’ur ona ka foin mak halo.
Jornalista: Natalino Costa
Editór: Xisto Freitas da Piedade

