Membru CSP ne’ebé envolve asidente tráfegu iha Ponte Komoro III aseguradu

DILI, 01 Juñu 2025 (TATOLI)—Komandu Polísia Nasionál Timor-Leste (PNTL) Munisípiu Dili asegura ona suspeitu sira-ne’ebé envolve iha kazu asidente tráfegu ne’ebé akontese iha área Ponte Komoro III, Fomentu II, Domingu (01/6), tuku 06:00 Otl.
Kazu ne’e akontese bainhira sidadaun na’in-rua para hela motorizada iha ponte nia sorin, derepente membru Korpu Seguransa Pesoál (CSP-sigla portugeza) husi membru Governu balun ho karreta kór metan marka Karreta Estadu, halai ho velosidade maka’as soke vítima na’in-rua ne’ebé para hela ne’e to’o monu tama iha ponte okos inklui karreta.
Hosi asidente tráfegu ne’e, rezulta vítima na’in-rua ida kanek grave no ida seluk liman tohar.
Komandante PNTL Munisípiu Dili, Superintendente Xefe Polísia Orlando Gomes, haktuir hafoin akontese asidente ne’e, ekipa investigasaun hosi Tránzitu Seguransa Rodoviária Munisípiu Dili to’o kedas iha fatin akontesimentu hodi halo atendimentu.
“Vítima sira-ne’e estudante. Momentu ne’ebá ita mós evakua kedas bá iha Hospital Nacional Guido Valadares (HNGV) hodi halo tratamentu saúde. Agora na’in-ida kondisaun di’ak uitoan ona no fila bá uma ona, más ida seluk sei kontinua halo tratamentu,” Orlando Gomes dehan ba jornalista sira iha edifísiu Komandu PNTL Munisípiu Dili, Kaikoli, segunda ne’e.
Komandante Orlando informa membru CSP na’in-rua suspeitadu lanu bainhira kondús veíkulu. “Ita seidauk identifika katak sira lanu, tanba sei iha prosesu identifikasaun ba sira-nia kondisaun,” nia relata.
Orlando esklarese katak, kona-ba evidénsia ligadu ba asidente referidu, Komandu asegura hela hodi submete bá Ministériu Públiku.
“Evidensia ne’ebé ita rekolla iha fatin akontesiamentu ne’e mak hanesan karreta no motorizada. Sasán sira-ne’e ita asegura hotu iha-ne’e, hodi submete ba prosesu investigasaun,” nia tenik.
Komandante PNTL Munisípiu Dili ne’e lakohi mensiona identidade membru CSP ne’ebé envolve iha asidente tráfegu ne’e.
Nia hatutan, kondisaun membru polísia sira iha asidente ne’e hetan kanek uitoan iha parte hasan nian, maibé ladún grave.
Jornalista: Natalino Costa
Editór: Xisto Freitas da Piedade

