DILI, 04 Juñu 2025 (TATOLI)—Polísia Nasionál Timor-Leste (PNTL) liuhusi Departamentu Investigasaun Kriminál no Forénsiku halo buska no apreensaun ba suspeitu na’in-rua ho inisiál IFP, NS ne’ebé mak envolve krime tráfiku umanu tanba rekruta timoroan sira bá servisu iha Slovakia.
Departamentu Investigasaun Kriminál Nasionál no Forénsiku halo buska no apreensaun ba suspeitu sira-nia rezidénsia iha área Beto, Suku Madohi no iha Bebora (Suku Bairru-Pité), hahú iha kuarta ne’e, 04 Juñu 2025, tuku 09:14 Otl.
“Buska no apreensaun ne’e bazeia ba mandadu Tribunál ho NUC 0139/25 PNSIC,” sita husi komunikadu ne’ebé Tatoli asesu husi Departamentu Investigasaun Kriminál Nasionál no Forénsiku, kuarta ne’e.
Hahalok suspeitu na’in-rua ne’e, Ministériu Públiku promove ho krime tuir artigu 60 no 61 husi Kódigu Prosesu Penál ne’ebé ko’alia kona-ba direitu no devér arguidu nian. Ministériu Públiku promove mós ho artigu 186 tuir Kódigu Penál Timor-Leste.
Notísia relevante: Komandu PNTL rejista timoroan na’in-68 vítima ba krime tráfiku umanu
Evidénsia ne’ebé ekipa Departamentu Investigasaun Kriminál no Forénsiku rekolla iha suspeitu na’in-rua nia rezidénsia mak hanesan dokumentu sira hamutuk envelope rua ne’ebé suspeitu sira uza hodi halo rekrutamentu ba timoroan sira.
Tuir obrservasaun Tatoli iha terrenu, suspeitu na’in-rua agora daudaun submete ona prosesu identikasauun iha Departamentu Investigasaun Kriminál Komandu Jerál PNTL Kaikoli.
Timoroan sira sai vítima ba tráfiku umanu ne’e tanba molok ne’e monu ba avizu sira-ne’ebé iha rede sosiál ne’ebé hateten loke rekutamentu ba sidadaun sira-ne’ebé interese ba servisu iha nasaun ne’ebé mesionada.
Bainhira timoroan ne’e aplika ba rekutamentu sira-ne’ebé halo iha rede sosiál ikusmai sira liu duni no ema ne’ebé rekruta sira-ne’e balun iha Timor mak servisu hamutuk ho ema iha nasaun referida, no bainhira timoroan hirak-ne’e bá to’o fatin destinasaun, sira la bá serbisu tuir saida mak molok ne’e fó-sai iha rekrutamentu, más ema sira-ne’e uza maluk timoroan bá halo fali atividade seluk.
PNTL detein suspeitu na’in-rua
Entretantu, Portavóz Komandu Jerál PNTL, Superintendente Polísia João Belo dos Reis, hateten Departamentu Investigasasun Kriminál Nasionál deside detein suspeitu na’in-rua ho inisiál RSA no IEPS tanba iha inísiu envolve krime tráfiku umanu ne’ebé tenta rekruta joven timoroan na’in-14 ba servisu iha Slovakia iha fulan kotuk.
Nia dehan, detensaun ne’e bazeia ba mandadu husi Tribunál ne’ebé haruka autoridade seguransa ho númeru NUC 0139/25.PNSIC ne’ebé husu ba Autoridade Polísia atu halo buska, apreensaun no detensaun ba suspeitu na’in-rua tanba iha inísiu sira envolve iha krime tráfiku umanu.
“Ohin ita ezekuta mandadu Tribunál mandadu ne’e iha funsaun tolu. Ida mak mandadu buska, seluk apreensaun no seluk tan detensaun. Hakarak informa ba maluk sira katak husi sidadaun na’in-tolu ne’ebé mak tuir loloos ita halo buska, apreensaun no detensaun ba sira, maibé ida mak la konsege tanba sei iha prosesu administrativu balun. Iha sidadaun na’in-rua mak ita halo buska, apreensaun no detensaun ba. Ida mak ho inisiál RSA, IEPS,” João Belo hateten ba jornalista sira iha nia kna’ar fatin, Komandu Jerál PNTL, Kaikoli, kuarta ne’e.
Belo informa, sidadaun rua ne’e agora iha ona Investigasaun Kriminál nia liman depois ba prosesu identifikasaun no sei halo detensaun ba sira na’in-rua.
“Tuir mandadu ne’ebé mak ami iha ne’e sei halo detensaun ba sidadaun na’in-rua ne’e durante oras 72. Depois sei aprezenta ba Trubunál,” nia informa.
Portavóz Komandu Jerál PNTL ne’e relata katak sidadaun sira-ne’e halo sira-nia atividade rekruta ema ba servisu Slovakia ne’e kle’ur ona liuhusi sira-nia empreza ho inisiál M hodi halo rekrutamentu ba ema, maski empreza referida la rejista iha SERVE nu’udár empreza ka ajénsia ba rekrutamentu sidadaun timoroan bá servisu Slovakia.
Belo hateten, evidénsia sira-ne’ebé polísia foti ne’e agora asegura ona iha Departamentu Investigasaun Kriminál no agora halo hela investigasaun ba dokumentu sira-ne’e.
Jornalista: Natalino Costa
Editór: Xisto Freitas da Piedade
