DILI, 05 Juñu 2025 (TATOLI)—Sekretáriu Estadu Asuntu Toponímia no Organizasaun Urbana, Germano Santa Dias Brites husu ba públiku atu respeita sinál tránzitu ne’ebé antes ne’e Diresaun Nasionál Transporte Terrestre (DNTT) estabelese ona.
Antes ne’e, ekipa husi Sekretaria Estadu Asuntu Toponímia no Organizasaun Urbana (SEATOU) hamutuk ho Diresaun Nasionál Transporte Terrestre (DNTT) monta sinál tránzitu 12 iha área Kampung Baru, hafoin halo libertasaun espasu públiku, maibé hafoin liu loron hirak negosiante sira hahú fa’an iha fatin ne’e no motorizada sira para la tuir regra.
“Fó hanoin ba motorista sira katak sinál tránzitu ne’e ita tenke respeita, la presiza seguransa mak ba halo kontrola iha fatin ne’e, maibé bainhira monta ona sinál tránzitu ne’e regra ida atu bandu para ita koopera no kumpre, la’ós tau tiha sinál tránzitu ita ba sente ladi’ak estraga tiha. Ne’e ladun di’ak ida,” Sekretáriu Estadu hateten iha Lorumata, Kinta ne’e.
Notísia relevante : DNTT no SEATOU monta sinál tránzitu 12 iha estasionamentu Kampung Baru
Ekipa sei kontinua fó avizu nafatin hodi komunidade bele kompreende no koopera.
“Ita sei kontinua serbisu hamutuk ho Polísia Nasionál Timor-Leste (PNTL) liuliu Polísia Tránzitu atu sosializa regra ne’e iha baze liuhusi fó avizu ba komunidade sne’ebé halo movimentu iha diresaun Kampung Baru,” nia akresenta.
SEATOU sei serbisu hamutuk ho PNTL Eskuadra Dom Aleixo no entidade relevante seluk hodi sosializa regra no sinál tránzitu.
“Ita sei serbisu hamutuk tan ho Jestaun munisípiu Dili atu apoiu serbisu Polísia Tránzitu tanba área Komoro ne’e luan no rekursu umanu PNTL iha Dom Aleixo mós ladun barak”, nia reforsa.
DNTT antes ne’e hasai ona regra katak, bainhira motorista sira-ne’ebé la kumpre sinál tránzitu, maka Polísia Tránzitu sei foti motorizada lori bá edifísiu PNTL no sei aplika multa.
Jornalista : Alexandra da Costa
Editora : Julia Chatarina
