Ministru Nino Pereira apresia inisiativa El Compad Farm harii inkubasaun produsaun manu-tolun
DILI, 07 Juñu 2025 (TATOLI)–Ministru Komérsiu Indústria, Nino Pereira hamutuk ho Sekrétariu Estadu Pekuária, José Vieira de Araújo, Sábadu ne’e, partisipa iha atividade lansamentu mini fábrika inkubasaun ba produsaun manu-tolun husi Kompañia El Compad Farm, iha Hali Dolar, Hera.
Kompañia ne’e harii husi timoroan ho objetivu atu hamenus produtu importasaun, ajuda promove joven dezempregu sira hodi serbisu, no bele investe produsaun manu bloiler, manu timor no manu rade ba merkadu interna.
“Ita hakarak fó apresiasaun ba inisiativa sira hanesan ne’e para tulun mós Governu iha polítika diversifikasaun ekonómika no kriasaun empregu, nune’e polítika IX Governu mós hakarak promove emprendedorizmu ba jestaun negósiu iha merkadu ne’ebé mak di’ak bele promove kompañia ne’e rasik,” Ministru Nino Pereira informa ba jornalista sira iha mini fábrika, Hera.
Notísia relevante : Folin foos no manu-tolun hahú sa’e
Governante ne’e nota, kompañia lokál ne’e hatudu ona ninia kompromisu forte atu asegura atividade emprezariál no bele investe to’o munisípiu hodi bele dezenvolve ekonomia lokál iha munisípiu sira.
“Kompañia iha objetivu no planu forte tebes nune’e Governu sei serbisu hamutuk ho setór privadu sira atu nune’e bele promove di’ak liután atividade emprendedorizmu ne’e efetivu iha Timor-Leste,” nia akresenta.
Iha sorin seluk, Sekrétariu Estadu Pekuária, José Vieira de Araújo, konsidera inisiativa husi timoroan ne’e di’ak maski foin mak harii maibé timoroan barak mak serbisu hamutuk hodi hamenus produtu importasaun no kria kampu traballu ba joven sira seluk.
“Governu kria programa atu hasa’e produsaun husi setór privadu sira, tanba ne’e ohin ita mai atu halo lansamentu ida-ne’e inklui mós apoiu nafatin hodi fó pasu di’ak ida ba produsaun rai-laran,” Sekretáriu Estadu tenik.
Kompañia ne’e harii iha inísiu Maiu 2024 no foin mak lansa iha Juñu ne’e, ho totál orsamentu ba konstrusaun mini fábrika hamutuk $500.000 no hetan empéstimu husi Banku Nasionál Komérsiu Timor-Leste (BNCTL, sigla portugés) ho 30%.
Jestór kompañia El Compad Farm, António Lela Hunu, informa, prosesu inkubasaun manu-tolun uza manu bloiler, manu timor no manu rade.
“Ho kapasidade sei prodús kada fulan hamutuk 300.000, ne’ebé sei distribui ba agrikultór no inan-aman sira-ne’ebé mak hakarak hakiak manu iha baze hodi kontinua halo negósiu fali,” Jestór kompañia hato’o.
António Lela Hunu dehan, kompañia ne’e eziste atu ajuda agrikultór sira iha baze hodi hakiak manu tanba sira halo ona teste ba manu-tolun 12.500 no susesu ona 95%, nune’e semana oin ekipa hahú hatama manu-tolun husi Indonézia no Austrália hodi prosesa no fa’an iha merkadu.
“Prosesu inkubasaun ba manu-tolun ne’e durante loron 18 ho ekipamentu ne’ebé ita iha hamutuk 12.500 no apoiu mós husi traballadór na’in-30 ne’ebé serbisu iha fatin ne’e,” nia tenik.
Kompañiia seidauk iha planu atu investe iha estranjeiru maibé hakarak investe de’it iha merkadu rai-laran tanba bele hamenus produtus importasaun.
Durante ne’e kompaña El Compad investe ona manu 5.000 ba grupu kooperativa sira no balun to’o 10.000.
Jornalista : Alexandra da Costa
Editora : Julia Chatarina
