PR Horta no PM Xanana apela ba joven sira kuidadu ambiente tasi ho di’ak
DILI, 07 Juñu 2025 (TATOLI)- Prezidente Repúblika Demokrátika Timor-Leste, José Ramos Horta no Primeiru-Ministru, Kay Rala Xanana Gusmão, iha abertura feira gastrónomia loron mundiál Oseanu, husu joven sira tenke kuidadu ambiente tasi ho di’ak.
Selebrasaun ba loron mundiál oseanu nian, Timor-Leste realiza marsa karavana ne’ebé kompostu husi entidade oioin hodi partisipa marsa hahú husi Ministériu Negósiu Estranjeiru to’o Portu Dili, maibé antes ne’e mós Governu abertura ona loron semana mundiál oseanu iha loron 01 Juñu tinan ne’e, nune’e ohin loron kontinuasaun husi atividade semana tasi nian hodi loke abertura ba feira gastrónomia ho objetivu atu promove ai-han tasi nian.
Prezidente Repúblika Demokrátika Timor-Leste, José Ramos Horta, apela ba joven sira atu hatudu sira-nia kriatividade hodi kuidadu ambiente tasi no ba natureza liuliu hadomi natureza, hadomi tasi no tenke hadomi mós rai.
“Labele so’e lixu arbiru iha mota laran, tasi ninin, labele tesi ai arbiru, so’e lixu iha estrada, labele oho balada sira iha ai-laran inklui tasi-laran maibé tenke kuda modo, ai-horis sira iha uma no eskola ida-ne’e mak mensajen ba meiu ambiente. Tanba ita hadomi tasi entaun labele so’e foer iha mota laran atu mota labele lori lixu hotu-hotu tun ba halo fo’er ita-nia tasi”, PR Horta apela iha Portu Dili, ohin.
Prezidente Repúblika husu ema hotu tenke konserva biodiversidade marítima tanba se oho hotu animál tasi sei fó impaktu ba biodiversidade marítima hodi hamenus baleza tasi nian no ikus mai sei mohu hotu. Tanba ne’e inisiativa husi atividade ida-ne’e atu eduka ema hotu hodi kuidadu paisajen Timor nian.
Iha biban hanesan, Primeiru-Ministru, Kay Rala Xanana Gusmão, apela ba joven sira tenke kuidadu ambiente tasi ho di’ak tanba tasi mak beleza ne’ebé nakonu ho animál oioin no sai hanesan biodiversidade turístiku ne’ebé bele atrai entidade oioin husi fatin seluk.
“Ita haree katak partisipasaun juventude nian mós barak ida-ne’e atu hatudu katak juventude sira komesa preokupa ho sira-nia futuru rasik, no husi ne’e atu fó hanoin ba joven hotu-hotu liuliu ba labarik sira katak se ita la kuidadu ita-nia tasi hahú agora, entaun imi-nia futuru mós sei susar”, Primeiru Ministru, Xanana Gusmão, apela iha Portu Dili, ohin.
PM Xanana informa, atividade ne’e la’ós hala’o de’it iha Dili maibé hala’o mós iha munisípiu hotu-hotu tanba tasi importante tebes ba ema-nia moris ho mudansa klímatika ne’ebé ladun di’ak bele estraga biodiversidade hotu, nune’e ida-ne’e lisaun ba mundu tomak la’ós de’it ba Timor.
“Tanba ne’e nafatin husu ba labarik sira kudandu temi ha’u-nia tasi, ha’u-nia timor ne’e katak se ha’u la kuidadu ha’u nia tasi, ha’u-nia timor sei rahun. Tanba futuru timor ne’ebé di’ak iha jerasaun foun sira-nia liman, nune’e hahú hala’o agora”, Xanana reforsa.
Atividade ida ohin ne’e, marka prezensa husi entidade Governu sira, grupu karavana husi eskola sira hahú husi ensinu sekundáriu to’o ensinu superior no grupu rua-nulu ne’ebé prienxe ba feira gastronómia nian iha Portu Dili.
Tuir planu aban tuku 09:00 ho balun sei misa hamutuk iha Igreja Katedrál, Vila Verde Dili hafoin ne’e kontinua ensera atividade oseanu nian.
Jornalista: Alexandra da Costa
Editór: Florencio Miranda Ximenes
