DILI, 05 Juñu 2025 (TATOLI)- Sekretária Estadu Igualdade (SEI), Elvina Sousa Carvalho, husu ba ema hotu atu hapara no prevene komete asédiu seksuál iha espasu públiku tanba ne’e nu’udar aktu violénsia bazeia ba jéneru.
“Asaun ida-ne’e mak fó impaktu ne’ebé naruk ba vitíma sira tanba bele hamosu depresaun (stress) hanesan bainhira asaun ne’e akontese ba feto ida iha servisu fatin, entaun bele halo nia moe, taka-aan no nia lakohi atu espresa ninia potensialidade tomak tanba nia vitíma ida husi asaun referidu”, Sekretária Estadu ne’e informa ba jornalista sira iha salaun enkontru Suai Room, Timor Plaza, Dili, Sesta feira (05/06/2025).
SEI servisu hamutuk ho Komisaun Funsaun Públika, liña ministeriál no Ministériu Edukasaun hodi haree mekanizmu hodi prevene asédiu seksuál iha instituisaun públiku no privadu.
“Ami servisu hamutuk ho Ministériu Edukasaun atu trasa planu efetivu hodi hamenus asédiu seksuál iha eskola hotu liuliu universitáriu sira. Durante ne’e SEI mós hamutuk ho Organizasaun Internasionál Uniaun Nasionál ba Feto (UN Woman, sigla inglés) hodi halo lansa akordu ida ba universitáriu sira atu livre husi asédiu seksuál. Ha’u fiar katak ida-ne’e bele redús asédiu seksuál no aksaun sira seluk ne’ebé hamate vontade ka dignidade feto sira-nian”, membru governante ne’e relata.
Dadus hatudu kazu asédiu seksuál ne’e akontese dalaruma mós liuhusi kargu katak uza nia poder tomak hodi halo asaun ne’ebé mak ladi’ak ba ema seluk, no dalaruma mós nia konsumu alkohól
SEI sempre halo sosializasaun ba asuntu ida-ne’e no la’ós SEI de’it mak halo sosializasaun, maibé parseiru dezenvolvimentu sira seluk ne’ebé iha kompromisu ba prevensaun ne’e no mós kontinua halo sensibilizasaun iha territóriu.
“Ema hotu tenke konsiente katak laiha ema ida mak atu halo asédiu seksuál hasoru ema seluk tantu feto ka mane, entaun ida-ne’e nu’udar esforsu koletivu entre SEI no parseiru sira tanba hetan keixa barak no keixa barak mak vítima la ko’alia sai”, nia hatutan.
Entretantu Parlamentu Nasionál aprova proposta Orsamentu Jerál Estadu (OJE) 2025 ba Sekretária Estadu Igualdade no Jéneru hamutuk $1,835,595, hodi aloka ba saláriu no vensimentu $919,350, bens (sasán) no servisu $716,245 no transferénsia públika rihun $200.
Husi orsamentu ne’e hotu hodi finansia programa funsionamentu no dezenvolvimentu institusionál ho sub-programa tolu no atividade lima, hanesan programa inkluzaun sosiál ho sub-programa integrasaun kompromisu jéneru no inkluzaun sosiál iha programa lei no orsamentu Estadu no komunidade ein-jerál ho nia atividade tolu.
Sub-programa empoderamentu ekonómiku feto no komponente sira seluk ne’ebé vulneravél liu ho atividade ida, sub-programa planeamentu monitorizasaun no avaliasaun ho atividade rua, sub-programa relasaun públika no mídia ho atividade rua, sub-programa dezenvolvimentu rekursu umanu ho atividade rua, sub-programa hapara violénsia kontra feto no labarik feto no komponente sira seluk ne’ebé vulneravél ho nia atividade tolu.
No sub-programa partisipasaun feto iha polítika no nivél foti desizaun ho atividade ida.
Notisia relevante:Governu sensibiliza prevensaun asédiu seksuál iha servisu públiku
Jornalista: Alexandra da Costa
Editór: Florencio Miranda Ximenes
