DILI, 09 Juñu 2025 (TATOLI)—Portavóz Kandidatu Traballadór Korreia, Júlio da Conceição husu Sekretaria Estadu Formasaun Profisionál no Empregu (SEFOPE), liuhusi Diresaun Nasionál Empregu Estranjeiru (DNEE) tenke halo atendimentu justu ba kandidatu traballadór sira hotu.
“Ami husu ba SEFOPE liuhusi DNEE tenke halo atendimentu ida justu ba kandidatu traballadór sira hotu tanba ami hahú tuir kursu lian Korreia iha tinan 2022 ho durasaun kursu fulan neen no balun tuir kursu fulan neen resin no ami hahú ezame iha Jullu 2023, ramata ezame iha Outubru iha tinan 2023, valór teste boot no tuir teste skill mós ho valór boot. Depois, ami tuir Skill Teste Esp Topik totál hamutuk ema na’in-1.141 pasa iha ezame. Prosesu tuirmai SEFOPE haruka kandidatu timoroan sira tenke kompleta dukumentu iha tinan 2024 to’o 2025, más tinan ida resin ona traballadór timoroan sira-nia kontratu la tama,” Júlio dehan bainhira halo konferénsia imprensa, iha Bekora, segunda ne’e.
Nia hateten, traballadór sira-ne’e hein tinan ida ona to’o ID Card mate no kandidatu balun nia dokumentu seidauk aprovadu.
Kandidatu traballadór husu ba SEFOPE liuhusi DNEE buka solusaun hodi rezolve problema sira-ne’ebé kandidatu sira hasoru durante ne’e.
“Ami-nia ezijénsia ba Prezidente Repúblika, José Ramos Horta, Primeiru-Ministru, Kay Rala Xanana Gusmão, atu fó xamada ba SEFOPE nune’e bele buka solusaun ba problema ne’ebé agora kandidatu traballadór timoroan sira enfrenta,” nia propoin.
Júlio relata, kandidatu traballadór hamutuk 250 iha tinan 2023 seidauk bá servisu iha Korreia, maibé tinan 2024 kontratu barak mai nune’e balun servisu ona iha Korreia.
Nune’e, iha tempu hanesan, jornalista sira koko atu konfirma asuntu ne’e ba Diretór Nasionál Empregu Estranjeiru (DNEE), maibé sei viajen hela ba rai-li’ur.
Jornalista: Felicidade Ximenes
Editór: Xisto Freitas da Piedade
