DILI, 11 Juñu 2025 (TATOLI)—Polísia Nasionál Timor-Leste (PNTL) liuhusi Komandu Munisípiu Dili, daudaun né’e, buka tuir suspeitu ne’ebé mak sona vítima Mariano de Jesus Pereira iha área Gruta Golgota, Kampung Baru, Suku Komoro, Postu Administrativu Dom Aleixo, Munisípiu Dili.
Kazu ne’e akontese iha tersa (10/06) tuku 21:00 Otl, bainhira vítima sosa lilin atu bá reza iha gruta, depois mak iha suspeitu deskoñesidu sona vítima kona iha kabun mamar parte karuk nian to’o vítima monu ba rai, nunee parte ekipa patrulla Eskudra Dom Aleixo no komunidade parte iha área referida hetan hodi transporta kedas ba Hospital Nacional Guido Valadares (HNGV) hodi hala’o tratamentu.
Komandante PNTL Munisípiu Dili, Superintendente Xefe Polísia, Orlando Gomes, haktuir katak to’o agora vítima seidauk hato’o keixa bá Komandu PNTL Munisípiu Dili no Komandu Munisípiu Dili mós seidauk hatene loloos motivu hosi kazu referidu.
Nia hatutan, polísia sekreta sira kontinua tun iha terrenu atu buka hatene no buka identifika suspeitu prinsipál ne’ebé mak sona vítima.
“Autoridade seguransa foti sidadaun na’in-rua ne’ebé nu’udár testemuña ba akontesimentu ne’e tanba momentu ne’e sira na’in-rua mak haree vítima latan ona iha rai. Tanba, tuir informasaun katak momentu ne’e sira na’in-rua mós la’o ba gruta atu reza, tanba ne’e mak polísia foti sidadaun rua ne’e hodi lori submete ba identifikasaun,” nia informa.
Orlando hateten, ba kazu ne’e, autoridade seguransa liuhusi investigasaun Eskuadra Dom Aleixo halo ona prosesu identifikasaun hodi submete ona ba Ministériu Públiku.
Nia informa, polísia seidauk bele foti deklarasaun husi vítima Mariano de Jesus Pereira tanba vítima sei halo tratamentu iha iha ospitál.
Vítima baixa ona iha HNGV
Entretantu, Team Líder Médiku ne’ebé Responsavel iha tersa ne’e iha Sala Emerjénsia HNGV, Julião Sequeira, rekoñese katak vítima oras ne’e baixa ona iha HNGV hafoin transferidu husi Sentru Saúde Komoro.
“Ami simu iha emerjénsia iha hodikalan maizumenus tuku 11:41 Otl, mai ho razaun tanba sona no hetan ataka husi ema deskonfidu balun,” Julião dehan ba Jornalista sira iha nia kna’ar fatin, HNGV.
Nia hateten, pasiente to’o iha sala emerjénsia hetan kedas atendimentu husi profisionál saúde sira no halo kedas ezame fíziku tanba vítima hetan sona husi parte kabun karuk.
“Kanek iha kabun maizumenus medida 1 cm no nia luan maizumenus 0,5 cm. Pasiente kondisaun alerta no mós hasai Raiu-X. Ba parte seluk di’ak no agora daudaun pasiente iha hela emerjénsia, sona ona ho ai-moruk. Planu sei lori ba parte sirúrjia tanba rezultadu husi leno kabun nian, hetan pankada metan iha ne’ebá,” nia esplika.
Tuir nia katak agora daudaun ne’e pasiente ho kondisaun jerál di’ak no hetan observasaun husi profisionál saúde sira husi parte emerjénsia depois mak sei transfere ba sala sirúrjia.
Iha fatin hanesan, família pasiente, Jony da Silva, informa hodikalan vítima sai husi uma maizumenus tuku 21:00 ho intensaun atu bá reza iha Gruta Golgota no reza tiha hotu no atu fila bá uma mak ema sona.
Tuir família katak kazu ne’e sei prosesu bá -oin tanba vítima ne’e durante la inklina aan iha grupu arte marsiál.
Jornalista: Natalino Costa/Felicidade Ximenes
Editór: Xisto Freitas da Piedade
