DILI, 12 Juñu 2025 (TATOLI)—Kadáver Matebian Reinaldo Ximenes to’o ona Dili ho Berlin Nakroma, kinta ne’e, tuku 06:00 Otl, hafoin tranzlada husi Rejiaun Administrativa Espesiál Oekusi Ambenu (REOA).
Bainhira to’o iha Portu Dili, simu direta husi Ofisiál Superiór Xefe Operasaun FALINTIL-Forsa Defeza Timor-Leste (F-FDTL), Koronél João da Costa Esteves, no hetan akompañadu husi ofisiál F-FDTL sira seluk no mós família matebian.
Notísia relevante: Breaking News: Membru F-FDTL ida mate ho mistériu iha Oekusi
Hafoin ne’e, tula kedas matebian nia kadáver bá Carro Funerário hodi dezloka bá Komponente Navál Hera, hodi hatuur iha misa requiem ne’ebé instituisaun relevante organiza molok lori matebian ba nia rai orijen, Postu Administrativu Laga, Munisípiu Baukau.
Tuir observasaun TATOLI iha terrenu, matebian nia sasán hanesan Kilat M4 ne’ebé nia uza no roupa sira, ninia kolega forsa ho naran Grumete Asoka entrega direta ba Koronél Esteves.
Jornalista: Natalino Costa
Editór: Xisto Freitas da Piedade
