PNTL sei fó xamada ba oknum polísia envolve dezentendimentu iha Bidau Masaur

DILI, 11 Juñu 2025 (TATOLI)—Komandante Polísia Nasionál Timor-Leste (PNTL) Munisípiu Dili, Suprintendente Xefe Polísia Orlando Gomes, hateten PNTL sei fó xamada ba membru PNTL ne’ebé baku inan-feton ne’ebé virál iha rede sosiál facebook, iha semana ne’e nia laran.
“Ita hotu-hotu akompaña no haree iha vídeo foin daudaun ne’e. Saida mak akontese iha terrenu, ita-nía polísia sira iha-ne’ebá hodi halo atuasaun. Ita orienta ita-nía polísia atubele halo xamada urjente ba polísia né’ebe mak komete erru iha terrenu, tanba servisu tenke ho profisionál para halo atendimentu di’ak ba públiku,” Orlando Gomes hateten ba jornalista sira iha kna’ar fatin, Kaikoli, kuarta ne’e.
Nia haktuir, kazu ne’e entre família ho família kona-ba disputa rai, entaun diskute malu entre bin ho alin nune’e to’o mosu dezentendimentu.
Orlando informa, kazu ne’ebé envolve hosi Polísia Tránzitu ne’e nu’udár atu responsavel pesoál nian.
“Agora daudaun polísia foti sira bá halo identifikasaun, depois mak bá detein iha sela. Komandu PNTL Munisípiu Dili promete sei loke prosesu investigasaun ba kazu referidu, hodibele prosesa tuir lei ne’ebé vigór iha Timor-Leste,” nia afirma.
Kazu ne’e akontese iha Bidau-Masaur, Postu Administrativu Kristu-Rei, Munisípiu Dili, ne’ebé envolve oknum Polísia Trázitu feto ida. Hafoin akontesimentu, Polísia Patrullamentu Eskuadra Kristu-Rei tun kedas bá lokál krime lori parte envolvidu bá Eskuadra Dom Aleixo, hodi submete ba identifikasaun.
Orlando husu ba sidadaun sira, tantu polísia, kuandu komete krime, Komandu PNTL sei la tolera.
Jornalista: Natalino Costa
Editór: Xisto Freitas da Piedade

