DILI, 14 Juñu 2025 (TATOLI)-Ministru Juventude Desportu, Arte no Kultura (MJDAK), Nelyo Isaac Sarmento, hateten Governu no setór privadu tenke kontinua koopera hodi dezenvolve desportu ba mundu.
Objetivu husi jogu futsal ne’e mak selebra aniversáriu Banku Nasionál Komérsiu Timor-Leste (BNCTL, sigla portugés) ba dala-XIV no mós promove jogadór sira-nia talentu.
Nelyo Isaac dehan agradese ba inisiativa ne’e. “Tempu tuir mai ita bele hetan atleta sira-ne’ebé di’ak hodi reprezenta ita-nia Estadu”.
Servisu hamutuk ho setór privadu sira, nia dehan importante hodi investe talenta joven sira iha área desportu, nune’e bele loke liras iha mundu desportivu.
“Ohin loron ita labele hanoin de’it ita susesu iha fatin hotu-hotu, maibé desportu hanesan meius ida atu halo selesaun nasionál ne’e metin liután ba futuru”, katak eis Sekretáriu Estadu Komunikasaun Sosiál ba jornalista sira iha kampu futsal Bebora, ohin.
Prezidente Konsellu Administrasaun BNCTL, Januário da Gama, hateten jogu futsal hanesan tradisaun hodi anima komunidade iha ámbitu aniversáriu BNCTL.
Importante seluk husi animasaun ne’ebé ho prémiu, nia dehan hametin amizade entre instituisaun sira, tantu públiku no privadu.
Ekipa ne’ebé sei partisipa iha jogu ne’e mak feto no mane hamutuk 70, ne’ebé rejistadu husi kada instituisaun.
“Bainhira ita partisipa iha jogu, bele mós kontribui ba saudé ne’ebé di’ak liután ba individu ida-idak ninian”, akresenta eis-dirijente husi ministériu finansa ne’e.
Jogu ida-ne’e hanesan oportunidade atu hakbesik prestasaun servisu bankaria ba sosiedade.
Durante eventu, BNCTL mós estabelese balkaun ida hodi fó oportunidade ba komunidade atu loke konta bankária, atualiza baze ba dadus bankária nian, rejistu internet banking no movel banking, inklui trata kartaun Uniaun Pin Internasionál (UPI, sigla inglés).
Prémiu ne’ebé BNCTL sei oferese ba klasifikasaun dahuluk husi ekipa feto no mane ho montante $5 mill, klasifikasaun daruak sei oferese ho montante $3 mill, enkuantu klasifikasaun datoluk sei oferese $2 mill.
Serimonia abertura ne’e hetan partisipasaun husi entidade Governu, setór privadu, jogadór sira no komunidade.
Notísia relevante: MF sai kampiaun ba tasa Futsal BNCTL Cup 2024
Jornalista : Alexandra da Costa
Editora : Rita Almeida
