Timor-Leste retifika votu iha ONU no reafirma apoiu ba kauza Palestina
DILI, 14 Juñu 2025 (TATOLI)—Misaun Permanente Timor-Leste iha Nova Iorke, retifika formalmente votu abstensaun ne’ebé fó ba Rezolusaun Organizasaun Nasaun Unida (ONU) kona-ba protesaun sivíl, kumprimentu ba obrigasaun legál no umanitária iha territóriu Palestina.
Rezultadu votu ba rezolusaun ne’e, a-favór 149, kontra 12 no abstensaun 19.
Iha karta ofisiál ne’ebé dirije ba Prezidente Sesaun Asembleia Jerál ONU ba dala-79 no Sekretáriu-Jerál, António Guterres, Embaixadór Dionísio da Costa Babo Soares hateten katak votu abstensaun ne’ebé fó la reprezenta pozisaun reál Timor-Leste nian.
“Depois konsiderasaun ho kuidadu, klaru katak ami-nia votu abstensaun ne’ebé fó iha loron 12 Juñu 2025 la reprezenta sentidu no pozisaun Timor-Leste kona-ba sofrementu povu Palestinu ba violénsia no mate sira ne’ebé indiskriminada,” Embaixadór Dionísio deklara liuhusi karta.
Notísia relevante : PN kongratula Dionísio Babo eleitu nu’udar Vise-Prezidente Asembleia Jerál ONU
Timor-Leste agora deklara intensaun atu fó votu “a-favór” ba rezolusaun ne’ebé kondena asaun ilegál husi Israél iha Jerusalém Orientál no iha territóriu Palestinu seluk ne’ebé okupadu, no apela ba protesaun sivíl.
Karta ne’e mós reafirma ho firme Timor-Leste nia apoiu ba kauza Palestina no husu atu cessar-fogu imediatu iha Gaza, protesaun ba sivíl no libertasaun dadur sira.
“Asaun ida-ne’e atu garante ami-nia pozisaun ne’ebé hatudu kompromisu ba dame, justisa no direitu povu Palestinu,” nia subliña.
Retifikasaun ida-ne’e hanesan jestu integridade diplomátika no solidariedade ba povu ne’ebé hetan opresaun.
TATOLI
