DILI, 17 Juñu 2025 (TATOLI)—Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes, hateten PNTL submete ona suspeitu ne’ebé suspeitadu ko’alia linguazen ladún étika hasoru governante sira ba Ministériu Públiku relasiona ho asaun luta ba auto-determinasaun povu Papua Oeste, iha Bebora, foin lalais ne’e.
“Domingu (15/6) foin lalais ne’e, iha debate televizivu ida iha Bebora, ita-nia ativista ida mak hasai linguazen ladún étika bainhira halo asaun hodi luta ba auto-determinasaun povu Papua Oeste. Entaun, iha momentu ne’ebá kedas ita hetan informasaun no asegura ba halo identifikasaun,” Orlando hateten ba jornalista sira iha nia kna’ar fatin, Kaikoli, tersa ne’e.
Nia dehan, PNTL halo identifikasaun ba supeitu referidu no hafoin halo tiha identifikasaun ba suspeitu ne’e, polísia haruka suspeitu fila bá nia uma no kazu referidu PNTL enkamiña ona bá Ministériu Públiku.
“Depoizde ita-nia investigadór halo tiha identifikasaun, ita kontinua monitoriza, más nafatin hato’o ba Ministeruu Públiku,” nia afirma.
Orlando hateten, bazeia ba identifikasaun ne’ebé polísia halo ba sidadaun MG, identifika katak sidadaun ne’e momentu konsume tua nune’e lanu mak hasai liafuan haat ba líder sira.
Jornalista: Natalino Costa
Editór: Xisto Freitas da Piedade
