BAUKAU, 17 Juñu 2025 (TATOLI)–Progresu reabilitasaun estrada Karavela husi diresaun Uaisá, Suku Tirilolo, bá área Lanud, Aeroportu Baukau, atinje ona pursentu 47.
Projetu referida nu’udár parte kontinuasaun ho totál distánsia kilómetru ualu ne’ebé fahe ba pakote rua ne’ebé pakote dahuluk responsabiliza husi kompañia DVP Konstrusaun Unipessoal. Lda ho totál kilómetru lima no kilómetru tolu resin responsabiliza husi Kompañia Sentrál Hill.
“Projetu ne’e pakote rua. To’o loron-13 fulan ne’e, pakote dahuluk nia progresu pursentu 22.5 no pakote daruak atinje pursentu 25 ona,” Koordenadór Tékniku Kompañia DVD Konstrusaun Unipessoal. Lda, Cesaltino hateten iha Kaisidu, Baukau, tersa ne’e.
Nia esplika, atinjimentu ba projetu ne’e, fizikamente konstrui ponte ho box claver hitu no monta manila RCPC neen ne’ebé atuál iha faze konkluida, enkuantu konstrusaun baleta, moru protesaun finalizada ona.
Aleinde ne’e, bainhira prosesu ne’ebé mensionadu finaliza sei kontinua serbisu ateru hodi kontinua ba prosesu implementasaun sabies, beiscors no faze ikus nahe alkatraun husi kilómetru ida to’o ualu.
“Agora iha etapa serbisu menór sira hotu ona. Tuirmai mak sabies nian, beiscors hotu fui ona alkatraun,” Celestino esplika.
Entretantu, projetu referidu tuir data kontratu hahú serbisu iha inísiu tinan-ne’e no sei terminadu iha inísiu tinan 2026 ne’ebé kada kompañia hanesan Kompañia DVP Konstrusaun Unipessoal. Lda akumula valór orsamentu Millaun $4.386.542,91 no Central Hill Unipessoal Lda akumula valór orsamentu Millaun $2.537.086,94.
Jornalista: Natalino Belo
Editór: Xisto Freitas da Piedade
