DILI, 12 Juñu 2025 (TATOLI)-Xefe Misaun Observasaun Eleitorál husi Uniaun Eropeia (MOE-UE), Domenec Ruiz Devesa, reafirma kontinua halo advokasia ba reforma eleitorál iha Timor-Leste.
“Reafirma katak Uniaun Eropeia sei kontinua halo advokasia ba reforma eleitorál sira iha Timor-Leste ba prosesu desentralizasaun atuál hanesan pasu ida ne’ebé simu ho di’ak tanba bele halo demokratizasaun iha Timor-Leste sai di’ak liu-tán”, Eis-Deputadu Parlamentu Europeu hatete iha konferénsia imprensa, ohin.
Nia husu ba autoridade Timor-oan atu aselera reforma eleitorál hodi garante transparénsia, inkluzividade no oportunidade ne’ebé hanesan ba kandidatu sira hotu antes eleisaun 2027 no 2028 tuirmai.
Enkuantu atualizasaun biométrika ba rejistu eleitorál, inklui ema sira ho defisiénsia hanesan sasukat pozitivu ida.
“Maibé ami nota katak laiha progresu konkretu iha implementasaun ba rekomendasaun sira ne’ebé MOE-UE fó iha tinan 2022 no Misaun Péritu Eleitorál (MPE UE) iha 2023. Interlokutór sira maiória mós konkorda katak iha urjénsia atu hahú servisu ba revizaun kuadru eleitorál”, nia dehan.
Nia afirma: “Ha’u enkoraja governu no parte interesada sira hotu atu aselera serbisu ida-ne’e. Ha’u estimula governu no partisipante sira hotu-hotu atu aselera servisu ida-ne’e”.
Tuir nia rekomendasaun sira ba konsultasaun husi Komisaun Eleisaun Nasional nian iha maneira ne’ebé konsistente bainhira prepara enkuadramentu regulatóriu ba eleisaun sira mak hametin kapasidade fiskalizasaun kampaña nian, revizaun ba regra sira finansiamentu kampaña nian maka xave atu hasa’e transparénsia no garante oportunidade ne’ebé hanesan ba konkorente hotu-hotu antes eleisaun tuir-mai.
Xefe misaun subliña mós importánsia hosi transparénsia iha prosesu reforma eleitorál, inkluzaun no kooperasaun hosi autór eleitorál sira, inklui organizasaun sira sosiedade sivil nian.
MOE-UE apresia relasaun di’ak ho atmosfera amizade durante enkontru sira ne’ebé hala’o ho interlokutór lubuk ida iha prosesu eleitorál, inklui Prezidente Parlamentu Nasionál, Komisaun Nasionál Eleisaun, Sekretariadu Tékniku ba Administrasaun Eleisaun, no instituisaun Estadu relevante, partidu polítiku, sosiedade sivíl, reprezentante mídia no parseiru dezenvolvimentu sira.
Nune’e Misaun organiza enkontru meza redonda hosi parte interesada eleitorál sira, iha ne’ebé partisipante sira diskute progresu ne’ebé halo ona to’o agora iha implementasaun rekomendasaun sira no estatutu atuál reforma eleitorál nian.
Notísia relevante: Uniaun Europea disponível sai observadór ba Eleisaun Parlamentár 2023
Jornalista : Osória Marques
Editora : Rita Almeida
