“Akompaña PR sai ajudante kampu iha Malázia-Mónaku ne’e previléjiu mai ha’u”
MALÁZIA, 21 Juñu 2025 (TATOLI)–Prezidente Repúblika, José Ramos Horta, marka istória foun ida ba Polísia Nasionál Timor-Leste (PNTL) tanba durante nia vizita privadu ba nasaun Malázia no vizita Estadu ba nasaun Mónaku fó konfiansa ba Sarjentu Xefe Delia dos Santos sai nu’udár ajudante kampu.
“Fofoun ha’u simu informasaun atu akompaña Prezidente Repúblika atu sai hanesan ajudante kampu mai iha Malázia no Mónaku, ida-ne’e hanesan previléjiu boot ida mai ha’u. Tanba, husi konfiansa ne’e hanesan primeiraves mai feto PNTL,” Sarjentu Xefe Delia dos Santos hateten ba Agência TATOLI iha Malázia, foin lalais ne’e.
Nia dehan, sai ajudante kampu ba Prezidente Repúblika hanesan esperiensia foun ba nia, nune’e nia prontu hala’o kna’ar ne’e ho responsabilidade.
“Bainhira ha’u simu informasaun atu sai ajudante kampu, nu’udár feto ida sente tauk tebes, tanba servisu ne’e la’ós hanesan servisu baibain ne’ebé ami Polísia halo, maibé servisu ne’e ita tenke prepara ita-nia mentalidade ne’ebé di’ak,” nia dehan.
Nia hatutan, servisu iha kaza militár Palásiu Prezidensiál kuaze tinan 10-resin, maibé seidauk sai nu’udár ajudante kampu maibé ho konfiansa husi Prezidente Ramos Horta ba nia nu’udár previléjiu ida.
“Ha’u servisu tinan barak ona iha Palásiu Prezidensiál, maibé nu’unka sai hanesan ajudante kampu. Entaun ha’u hetan konfiansa kolega feto ida Falintil-Forsa Defeza Timor-Leste (F-FDTL) Tenente Joaninha mak fahe nia esperiénsia mai ha’u, tanba nia mak daudaun ne’e sai hanesan ajudante kampu ba ita nia Prezidente Repúblika. Ha’u nia Xefe Kaza Militár mós fó apoiu maka’as mai ha’u, entaun ha’u fiar aan hodi la’o hala’o servisu ho di’ak,” nia hateten.
Tuir Delia, dezafiu ne’ebé nia hasoru bainhira sai ajudante kampu ba Xefe Estadu mak dalaruma todan tanba la’ós servisu maibé nia rasik esforsu hodi hala’o servisu ho responsabilidade.
“Ha’u primeiru sente kaku maibé ha’u esforsu-aan maka’as, ikus ha’u konsege hala’o servisu ho di’ak,” nia dehan.
Iha oportunidade ne’e, Sarjentu Xefe ne’e enkoraja ba feto PNTL sira hotu atu hala’o servisu ho di’ak no prontu simu responsabilidade saida de’it bainhira nasaun presiza, prepara aan nafatin no servisu nafatin ho di’ak.
Biografia badak
Sarjentu Xefe Delia dos Santos moris iha munisípiu Lautein iha loron 09 fulan-setembru 1980.
Hahú kareira hanesan PNTL iha tinan 2002 no Delia forma ona família iha tinan 2004 no hetan oan na’in-neen (6) ne’ebé kompostu husi mane haat (4) no feto rua (2).
Jornalista : Hortencio Sanchez
Editór : Cancio Ximenes
