OEKUSI, 25 Juñu (TATOLI) – Abitante iha aldeia Haemanu, suku Abani sub-rejiaun Pássabe, Rejiaun Administrativa Espesiál Oekusi Ambeno (RAEOA), rekomenda ba Diresaun Eletrisidade de Timor-Leste (EDTL) Oekusi, atu hadi’a fiu elétrika ne’ebé monu kuaze tinan ida ona iha área Haemnanu, tanba bele fó risku ba movimentu ema no animál sira.
Mauricio Elo, nu’udar lia-na’in iha aldeia Haemnanu suku Abani, dehan problema fiu monu iha poste-haat, akontese iha tempu bailoron iha tinan 2024 nian, maibé to’o agora parte EDTL seidauk hadi’a, nune’e nia espera Autoridade RAEOA bele konsidera hodi rezolve.
Notísia relevante:EDTL Oé-Cusse normaliza poste ne’ebé hetan estragu hosi dezastre naturál
“Fiu sira-ne’e monu iha airin haat, agora fiu sira-ne’e ita haree rasik, tau de’it iha rai no duut leten, ida-ne’e akontese dezde tempu bailoron ai-bo’ot iha 2024, depois problema ne’e mós, ami relata ona ba parte EDTL maibé sira lakohi mai, agora ami nia preokupasaun mak ne’e, tau ami-nia animál no ita ema, kuandu la’o mak kona kois ita mate ona, tanba fiu iha de’it rai nia leten,” nia informa iha sub-rejiaun Pássabe, foin lalais ne’e.
Tanba ne’e, nia rekomenda ba parte Elétrisidade de Timor-Leste (EDTL) Oekusi, atu halo normalizasaun hodi hadi’a fali, nune’e labele fo risku ba populasaun no animal sira.
“Ne’e mak mka husu ba sira tenki mai rezolve, tanba ahi loron kalan moris hela,” nia informa.
Iha biban hanesan, Jestór sub-rejiaun Pássabe, Paulino Marques, reforsa-tan, problema akontese tinan ida ona, maibé parte EDTL seidauk hadi’a. tanba ne’e nia rekomenda atu apoia emerjénsia, nune’e labele fó risku ba populasaun sira.
“Problema ne’e sériu, la’os foin akontese maibé dezde tinan kotuk, tanba problema laiha transporte ne’e mak husi EDTL la mai, entaun ida-ne’e bele fó ameasa komunidade sira no animál, entaun ami husu sei bele apoia urjenti, tanba ne’e ahi la’os dalan mak kotu ka problema bee-moos,” nia rekomenda.
Notísia relevante:Tékniku EDTL Oé-Cusse buka ona solusaun ba eletrisidade lakan-mate
Hatan ba preokupasaun ne’e, Xefe Departementu EDTL Oekusi, Antão Cabal, rekoñese maibé husi parte EDTL seidauk bele rezolve tanba problema transporte seidauk iha atu halo operasionál to’o área rurál sira.
“Ami rekoñese, ne’e responsabilidade EDTL nian, maibé to’o agora seidauk bele asesu liuliu ba área rurál sira tanba problema transporte, ita-nia veíkulu sira seidauk halo manutensaun, maibé ami informa ona ba ekipa liña distribuisaun iha sub-rejionál sira, atu bele tau matan hodi asegura provizóriamente, kuandu fasilidade apoia ona mak ita foin bele ba hadi’a,” nia dehan.
Notísia relevante:Janeiru to’o Maiu, EDTL Oekusi kontribui reseita rihun $36 ba kofre Estadu
Jornalista: Abílio Elo Nini
Editór: Florencio Miranda Ximenes
