OÉ-CUSSE, 29 dezembru 2022 (TATOLI)–Diretór Diresaun Rejionál Infraestrutura, liuhosi Departementu Eletrisidade Timor-Leste (EDTL) RAEOA, Kandidu dos Reis Amaral, husu ba konsumidór sira atu pasiensia relasiona ho liña eletrisidade ne’ebé mate, tanba tékniku sira buka hela solusaun.
Eletrisidade ne’ebé mate kauza hosi dezastre naturál, nia dehan tékniku sira presiza identifika ninian estragus, tenki kuidadu vida rasik, tanba bainhira tun terrenu persiza komunikasaun di’ak ho sentrál EDTL hodi kontrola ahi mate lakan, nune’e bele hadi’a ho situasaun seguru.
“Hanesan diretór husu ita hotu nia komprensaun ba interrupsaun ne’ebé mosu iha semana ne’e nia laran, tanba ita hotu persiza servisu hamutuk ho tékniku sira karik akontese dezastre ruma ne’ebé afeita ba liña eletrisidade”, katak nia iha Oé-cusse, kinta ne’e.
Daudaun ne’e ekipa tékniku sira hosi EDTL Oé-Cusse kontinua halo manutensaun iha terrenu, liu-liu iha fatin sira-ne’ebé akontese dezastre.
Nia mos husu ba konsumidór sira iha Oé-Cusse atu servisu hamutuk ho tékniku sira bainhira akontese dezastre naturál iha fatin ruma, bele koopera no servisu hamutuk hodi evita dezastre seluk.
“Ahi mate lakan ne’e ha’u hanoin ita hotu-hotu preokupa, ita-bo’ot sira iha razaun maibé ita tenki onestu, katak agora ita tama ona semana ida, udan bo’ot hamosu risku dezastre naturais oi-oin, afeita ahi mate lakan”, tenik Kandidu Dos Reis Amaral.
Tuir nia, dezde segunda to’o kinta semana ne’e ahi mate kuaze oras haat to’o lima, no loron tomak ida bele la lakan, tanba tékniku EDTL sira hala’o hela limpeja ba fatin sira-ne’ebé hetan estragus hosi dezastre hanesan anin bo’ot ai-monu kona fiu, nune’e persiza hamos lalais.
“Entaun hanesan diretór ha’u alerta nafatin ba tékniku sira atu servisu ho onestu, mezmu iha ferias hela, maibé ne’e ita-nia kna’ar no responsabilidade, ha’u rasik fó ona instrusaun atu alerta no toma atensaun maka’as karik mosu entragus iha fatin ruma, sira bele dezloka lalais atu rezolve situasaun ne’e”, nia afirma.
Jornalista : Abílio Elo Nini
Editora : Rita Almeida
