DILI, 26 Juñu 2025 (TATOLI)—Ministru Komérsiu no Indústria, Filipus Nino Pereira ho delegasaun governamentál sira, partisipa iha enkontru konjunta ne’ebé planeadu ho Kamar Dagang dan Industri (KADIN) Nusa Tenggara Timur (NTT) no Governadór NTT, atu diskute fortalesimentu relasaun komérsiu no kooperasaun industriál entre Timor-Leste no NTT.
“Kooperasaun ne’e sei hala’o iha tinan ne’e, hosi 29 Juñu to’o 1 Jullu 2025, foku espesiál ba esplorasaun oportunidade investimentu, promosaun produtu lokál no preparativu ba partisipasaun NTT nian iha Dili International Trade Expo (DITE) 2025, ne’ebé sei akontese iha Agostu iha Dili, tinan ne’e,” sita komunikadu imprensa ne’ebé TATOLI asesu husi Ministériu Komérsiu no Indústria (MCI-sigla portugeza), kinta ne’e.
Partisipasaun Timor-Leste iha enkontru referidu sei kompostu husi reprezentante sira husi Diresaun Jerál Indústria, Diresaun Jerál Komérsiu Internasionál no ekipa téknika relevante sira. Delegasaun sei halo aprezentasaun kona-ba plataforma promosaun investimentu iha DITE 2025, no fó proposta konkreta kona-ba mekanizmu kooperasaun konkreta entre setór públiku no privadu iha rai rua nian.
Ministru Komérsiu no Indústria, Nino Pereira, hateten katak enkontru konjunta ida-ne’e importante tebes no iha esforsu kontínuu atu hatuur barreira komérsiál, hametin konfiansa ekonomika, no aumenta dinamizmu merkadu rejionál ne’ebé favoravel ba dezenvolvimentu sustentavel iha Timor-Leste no NTT.
Ministériu Komérsiu no Indústria kontinua hetan oportunidade atubele buka kooperasaun efikáz ho parseiru rejionál sira hodi sustenta objetivu estratéjiku nasionál, inklui diversifikasaun ekonomika no promosaun setór industriál lokál.
Jornalista: Felicidade Ximenes
Editór: Xisto Freitas da Piedade
