DILI, 26 Juñu 2025 (TATOLI)—Sekretáriu Estadu Formasaun Profisionál no Empregu husu ba traballadór timoroan sira atu uza sira-nia abilidade, kompeténsia no finansiamentu ho di’ak atu kontribui ba nasaun Timor-Leste.
“Husu ba traballadór timoroan sira atu uza sira-nia abilidade, kompeténsia no finansiamentu ho di’ak atu kontribui ba nasaun Timor-Leste,” Sekretáriu Estadu Rogério Mendonça hateten iha ámbitu semináriu kona-ba programa reintregrasaun traballadór timoroan sira ne’ebé fila-husi Austrália, iha Palms Springs Hotel, Fatuhada, Dili, kinta ne’e.
Governu liuhusi Sekretaria Estadu Formasaun Profisionál no Empregu (SEFOPE) agradese ba Governu Austrália ne’ebé suporta programa reintregrasaun ho PALM ne’ebé hala’o iha Timor-Leste no apresia mós ba Diresaun Nasionál Empregu ne’ebé iha kompromisu hodi realiza programa semináriu reintegrasaun traballadór husi Austrália ho númeru ne’ebé boot.
“Apresia ba traballadór timoroan sira hotu ho família sira mai partisipa hodi rona filafali oradór ho peritu sira-ne’ebé sei hato’o informasaun ba ita-boot sira hodi lori ita-boot sira bá iha futuru. Ho hanoin katak traballadór timoroan sira mai-husi Austrália iha ona kapasidade, abilidade no kompeténsia, nune’e mós iha ona finansiamentu ne’ebé imi lori oinsá imi jere iha futuru,” nia afirma.
Iha tinan 2023, Sekretaria Estadu Formasaun Profisionál no Empregu (SEFOPE) hamutuk ho PALM no Diretór Jerál, Diretór Nasionál ho Xefe Departamentu sira hotu, estabelese departamentu reintregrasaun nune’e atu akompaña traballadór timoroan sira ne’ebé serbisu iha rai-li’ur.
Iha fatin hanesan, Diretór Nasionál Empregu Estranjeiru (DNEE), João Correia Pereira, informa Program Reintregrasaun atu hasa’e kreximentu ho númeru traballadór atu garante sustentabilidade no buka traballadór ho kualidade atu bá serbisu iha rai-li’ur.
“Ne’e atu hasa’e kreximentu ekonomia traballadór timoroan sira fila-mai hodi garante ka hakbiit ekonomia iha rai-laran,” nia esplika.
Traballadór benefisáriu sira-ne’ebé fila-husi Austrália mai Timor ho númeru hamutuk 1.891 iha tinan 2025.
Nune’e, Xefe Misaun Adjuntu husi Austrália, Edward Wilkinson, hateten traballadór sira durante bá servisu iha Austrália tinan naruk no la fásil, hetan obstákulu barak tanba buka serbisu hodi hadi’a ekonomia Timor-Leste nian.
“Ha’u fiar katak semináriu ne’e fornese buat ne’ebé di’ak no jere rekursu finansiamentu sira ne’e ho di’ak. Tanba ne’e, ha’u enkoraja ita-boot sira hotu atu fahe hanoin ba malu no mós halo konesaun sira-ne’ebe mak di’ak,” Edward Wilkinson konklui.
Jornalista: Felicidade Ximenes
Editór: Xisto Freitas da Piedade
