DILI, 30 Juñu 2025 (TATOLI) – Prezidente Komisaun G, iha Parlamentu Nasionál (PN), Armando Lopes, hateten Lei Baze Edukasaun foun sei halo mudansa ba iha setór edukasaun.
“Lei ida-ne’e sai forte hodi bele uza sai mudansa ba ita-nia Ministériu Edukasaun, liuliu eskola sira iha territóriu”, nia afirma iha Parlamentu Nasionál, ohin.
Tuir nia, projetu lei ne’e nia autór mak deputadu sira Komisaun G. “Ohin, ita tuur hamutuk atu fó hanoin hodi mellora [lei ne’e], atu ita bele uza lei iha tempu oin mai”, nia dehan.
Komisaun G ne’ebé trata Asuntu Edukasaun, Juventude, Desportu no Sidadania halo ona diskusaun ba lei referida iha faze espesialidade no to’o ona iha artigu 52.
“Projetu lei ne’e iha artigu 58. Iha sesta [semana kotuk] ami [diskuste no vota] to’o ona iha artigu 52”, prezidente ne’e reitera.
Nia esplika katak depois diskusaun nia laran iha aditamentu artigu rua no iha proposta 44. “Iha proposta 20-resin mak diskute hotu ona, hela de’it 20-resin no aditamentu iha rua. Ne’e ami ko’alia kona-ba proposta ida husi sosiedade sívil nian, aleinde kona-ba direitu professor”, nia akresenta.
Tuir Armando Lopes, proposta 44, ne’e la’ós artigu foun, maibé ne’e kestaun téknika de’it atu halo armonizasaun ho testu orijinál husi projetu lei ne’e hodi halo aditamentu ba alínea balun hanesan aumenta númeru no mudansa terminolojia.
“Ezemplu, durante nne’e ita uza de’it edukasaun, maibé termu edukasaun ne’e ami uza fali termu operasionál ne’e ba ensinu”, nia realsa.
Deputadu ne’e iha esperansa katak lei ne’e sei forte, tanba envolve Ministériu Edukasaun, Ministériu Administrasaun Estatál (MAE), diretór serbisu munisipál edukasaun no superintendente husi munisípiu tomak.
Revizaun ba enkuadramentu legál Lei Baze Edukasaun ne’e ho objetivu atu garante koerénsia normativa ne’ebé boot liu, tuir diploma sira ne’ebé aprova ona, ne’ebé regula nível oioin ensinu nian.
Lei ida-ne’e mai ho objetivu atu promove edukasaun inkluziva no ekuitativa, valoriza formasaun no progresaun ba karreira dosente, adapta lejizlasaun ho realidade lokál no hametin kompromisu Estadu nian ba edukasaun ne’ebé iha kualidade ba ema hotu.
Aleinde ne’e atualiza ba terminolojia ne’ebé daudaun la uza, atu asegura aliñamentu ho preseitu pedagójiku modernu sira ne’ebé konsagra ona iha lejizlasaun atuál.
Notísia relevante: Komisaun G diskute iha espesialidade projetu Lei Baze Edukasaun
Jornalista: Nelson de Sousa
Editora: Maria Auxiliadora
