DILI, 04 Jullu 2025 (TATOLI)—Inspetora Autoridade Inspesaun Fiskalizasaun Atividade Ekonómika Sanitária no Alimentár (AIFAESA), Odete Viegas, hateten AIFAESA fó sansaun ba Hotel Timor tanba la prienxe rekezitu.
“Iha loron 01 fulan-Jullu, ekipa sira urjente ba halo inspesaun iha Hotel Timor, iha ne’ebá no identifika katak la prienxe rekezitu hanesan hahan liu prazu no hahan estragadu, entaun deside fó sansaun administrative,” Odete Viegas informa,ba jornalista sira, iha edifisiu Aifaesa Matadoru,ohin.
Nia dehan, sei fó sansaun tuir ninia valór ne’ebé mak iha, tanba sei haree ba kuantidade se minimu fó sansaun mós tuir ida-ne’e.
“Depois ita haree liu prazu no estragadu ita haree valór barak ka uitoan. Se ita haree oitoan, ita fó tuir valór maibé se barak ita fó tuir nia produtu ne’ebé mak barak,” nia relata.
Nia hateten, Hotel Timor iha pontu kritiku tolu sifnifika katak ita fó sansaun ba nia, maibé la tak, banhira pontu kritiku liu lima signifika nia komete AAIFAESA taka provizóriu.
Iha loron 01 fulan-Jullu, Autoridade Inspesaun Fiskalizasaun Atividade Ekonómika, Sanitária no Alimentar (AIFAESA) halo inspeksaun emerjensia ba Hotel Timor, tanbá hetan keixa katak salada ulár.
Antes ne’e, Sub-Inspetora AIFAESA, Quitéria da Costa, informa ekipa AIFAESA halo Inspeksaun halo urjentiemai iha Hotel Timor tanba hetan keixa katak aihan ne’ebé mak la tuir prazu.
“Ami mai halo inspesaun urjente no hetan duni iha aihan ne’ebé mak estragadu nomós liu prazu, sira mós rekoñese katak loos duni, ita-nia Primeiru Ministru mai` pesan hahán salada ular. Entaun, ohin, ami fó ona rekomendasaun katak Hotel ida-ne’e Hotel boot tebes, presiza tau atensaun liuliu ba prepara hahan sira,” nia hateten.
Sub-Inspetora ne’e esplika, einjeral AIFAESA mai haree direta sira-nia hahan ne’ebé mak iha armajen, Zelera, buat hotu konserva ho di’ak.
Jornalista : Felicidade Ximenes
Editór : Cancio Ximenes
