DILI, 04 Jullu 2025 (TATOLI)-Ministru Defeza, Kontra Almirante Donaciano do Rosário da Costa Gomes, kompromete inisia lejislasaun oinsá estabelese sosiedade investimentu rekursu.
“Dezenvolve ita-nia dekretu-lei para estabelese sosiedade investimentu rekursu para fó biban ba setór privadu atu bele kontrola, halo akizisaun ba meiu militár hothotu, maibé dekretu lei ida-ne’e presiza haree iha Konsellu Ministru no sei akontese loron ida”, Klamar Fuik hatete iha nia intervensaun bainhira entrega viatura militár 18 ba Komandu F-FDTL iha Kuartél -Jenerál F-FDTL Fatuhada, sesta–ne’e.
Nia dehan, dekretu lei ida-ne’e fó oportunidade ba instituisaun Estadu nian, bele fó konfiansa ba setór privadu atu halo akizisaun ba meiu ne’ebé mak utilizadór finál militár sira utiliza no utiliza ho kualifikasaun.
“Sosiedade investimentu ba rekursu defeza ida-ne’e futuramente sei konstrui no sei dezenvolve, sei haree asuntu hothotu ne’ebé mak relasiona ho forsa armada ninia nesesidade, liuliu ekipamentu no rekursu hotu ne’ebé mak militár sira presiza”, nia afirma.
Nia reforsa sira ne’e nu’udar planu Ministériu Defeza, nune’e husu apoia planu ne’e, maibé atu alkansa ida-ne’e presiza iha domin ba instituisaun para bele halo desizaun maski iha kustu ne’ebé boot, maibé ba benefisiu ema-barak nian.
“Kuandu ami sira-ne’e pasa ba reforma, husik hela instituisaun ida di’ak, instituisaun ida konfiansa ba Estadu, ba Nasaun, ba povu”, nia konklui.
Notísia relevante: Komandu F-FDTL simu viatura militár ho unidade 18 husi governu
Jornalista : Natalino Costa
Editora : Rita Almeida
