DILI, 04 Jullu 2025 (TATOLI)-FALINTIL Forsa Defeza Timor-Leste (F-FDTL) simu viatura militár ho unidade 18 husi Governu liuhusi Ministru Defeza, Donaciano do Rosário da Costa Gomes “Pedro Klamar Fuik, iha Kuartél-Jenerál Fatuhada, sesta-ne’e.
Akizisaun viatura sira-ne’e maihusi Orsamentu Jerál Estadu 2023 ba karreta ho marka Isuzu Mini-Hicom unidade ualu ho montante $959.200 no $600.000 husi OJE 2025 ba karreta ho marka BAIC hamutuk unidade 10. Akuirimentu viatura hirak ne’e entre Ministériu Defeza ho kompañia Timor Safari no Dili Auto Service.
Viatura militár Isuzu mini-Hicom unidade ualu sei uza ba operasaun tátika no karreta 10 seluk sei apoia atividade administrativa militár nian.
Ministru Defeza, Pedro Klamar Fuik, husu atu kuidadu, ho responsablidade ba utilizasaun iha Komandu Komponente sira no Autoridade Marítima Nasionál.
Nia afirma ba komandante komponente no seksaun sira atu kontrola viatura bainhira halo servisu militár nian. Tanba, karreta militár-ida ne’ebé foin lalais hetan soke, ninia parte la simu relatóriu ba situasaun-ne’e.
Mesmu nune’e, hanesan governante nia nafatin apresia ba dezenvolvimentu institusionál husi tempu ba tempu. “Ita iha planu dezenvolvimentu forsa, presiza viatura transporte-nian hamutuk 56”.
Xefe Estadu Maior Jenerál F-FDTL, Tenente Jenerál Domigos Raul Falur Rate Laek, agradese ba Governu tanba viatura sira-ne’e bele ajuda ona servisu militár nian.
Falur Rate Laek mos husu ba dirijente sira hanesan Estadu Maior atu aselera diretiva ba utilizasaun transporte militár nian, nune’e bele halo kontrolu ne’ebé di’ak.
Reprezentante Empreza Timor Safari, Sidik Lijadi, agradese tanba hetan fiar husi governu hodi sosa karreta sira-ne’e iha fabrika Baic Besic Interternational Automotive, iha Tailándia no Xina.
Nia dehan fabrika fó garante tinan-rua kuandu sasan ruma la-di’ak, maibé sei la toma responsabilidade kuandu hetan asidente.
Notísia relevante: Ministériu Defeza distribui karreta tátika 10 ba F-FDTL
Jornalista : Natalino Costa
Editora : Rita Almeida
