Joven ida tuku membru PNTL iha Bebonuk

DILI, 06 Jullu 2025 (TATOLI)—Komandante Polísia Nasionál Timor-Leste PNTL (PNTL) Munisípiu Díli, Superintendente Xefe Polísia Orlando Gomes, hateten joven ida tuku membru PNTL ida iha área Fau Laran, suku Bebonuk, postu administrativu Dom Aleixo, munisípiu Dili.
Kazu ne’e akontese iha kuarta (2/7), tuku 01h00 madrugada, vitima nu’udár membru PNTLne’ebé durante ne’e halo kna’ar iha Komandu PNTL Munisípiu Manatutu iha diresaun Informasaun Polísia.
Momentu ne’e vitima referida partisipa serimónia aniversáriu nia alin nian iha Fau Laran, nune’e han-hemu, derrepente iha suspeitu MFS ho nia kolega na’in-haat (4) ba ho kondisaun lanu halo barullu iha fatin ne’ebé mak iha uma laran depois tuku vitima ninia inus nakles no raan sulin no vitima monu iha fatin kedan.
“Tuir relatóriu ne’ebé mak ita simu katak suspeitu tuku lezadu ninia inus besik matan fukun raan nakles. Hafoin informa ba patrulla Dom Aleixo ba iha fatin akontesementu Bebonuk Fau Laran, foti suspeitu ho inisial MFS,” Orlando hateten ba jornalista sira iha nia kna’ar fatin Komandu PNTL Munisípiu Dili, Kaikoli, domingu ne’e.
Orlando esplika, depois hetan informasaun delta dois orienta ba iha patrulla Dom Aleixo ba kedas iha fatin akontesementu atu nune’e foti lezadu ho suspeitu mai kedas iha eskuadra Dom Aleixo hodi halo identifikasaun kontinua prosesa.
Nia dehan, patrollamentu Dom Aleixo foti hotu suspeitu no mós ho nia kolega sira seluk tanba kondisaun lanu, entaun lori hotu mai iha eskuadra Dom Aleixo halo prosesu tuir lei ne’ebe mak iha.
“Kazu ida-ne’e ami konsidera iha kazu rua. Primeiru, kona-ba asaltu tanba sira kondisaun lanu ba iha uma ne’ebé ema halo hela ema-nia serimónia aniversáriu. Segundu, kuandu autoridade seguransa ne’e sira komete ona obstrusaun autoridades ne’e iha kazu rua bele prosesu. Ita-nia vitima halo ona tratamentu agora daudaun fila-fali ba sira-nia rezidénsia,” nia dehan.
Jornalista : Natalino Costa
Editór : Cancio Ximenes

