DILI, 07 Jullu 2025 (TATOLI)—Delegasaun Tsuneishi Shipbuiling husi nasaun Japaun segunda ne’e akompaiña husi Embaxadór Japaun iha Timor-Leste hasoru malu ho Prezidente Repúblika José Ramos Horta hodi atualiza progresu projetu sira-ne’ebé durante ne’e implementa iha Timor-Leste.
Notísia Relevante: Empreza Tsuneishi atualiza ba primeiru-ministru kona-ba investimentu iha Manatutu
“Delegasaun husi Tsuneishi hasoru malu ho Prezidente Repúblika hodi atualiza progresu projetu sira-ne’ebé hala’o hela iha Timor-Leste. Ami hato’o agradesementu ba Prezidente Repúblika ne’ebé apoia ona ami-nia projetu sira ne’ebé implementa iha Timor-Leste,” Embaixador Japaun iha Timor-Leste, Tetsuya Kimura, hateten ba jornalista sira hafoin reuniaun ho PR Horta, ohin.
Nia dehan, Tsuneishi estabelese ona edifisiu iha Timor-Leste kuaze tinan ida-resin no konsege fó ona servisu ba timoroan hamutuk na’in-37 ne’ebé envolve iha halo dezeñu ba Ró no timoroan sira-ne’e maiória gradua husi Universidade Nasionál Timor-Lorosa’e (UNTL) iha fakuldade Enjeñeria no Siénsia Teknolójia.
“Agora daudaun estajiadu na’in-10 ne’ebé hala’o hela estajiu iha Tokyo, fulan oin sei iha tan na’in-11 sei aranka ba Japaun hodi halo estajiu. Ida-ne’e mak ita-nia projetu hodi oinsá kapasita timoroan sira. Ami fó ona treinamentu iha Japaun no Timor-Leste kona-ba tékniku nian liuliu mekaniku ba Ró,” nia tenik.
Nia hatutan, Tsuneishi daudaun ne’e hala’o hela estudu viabilidade iha área Manatutu atu implementa projetu fabrika Ró.
Istória badak
Emprezáriu Katsutaro Kambara harii Estaleiru Shiohama iha tinan 1917 iha fatin atuál Estaleiru Tsuneishi nian. Ninia emprendimentu anteriór mak Kambara Kisen Co, Ltd, empreza ró nian ida.
Negósiu ne’e hahú ho konstrusaun ró sira ho ai. Shiohama depois tau hamutuk ho Estaleiru Fujii no Estaleiru Nishihama iha área Tuneishi hodi estabelese formalmente Tsuneishi Shipbuilding Co. Ltd. iha tinan 1942.
Hafoin Funu Mundiál Daruak, Tsuneishi muda ba produsaun ró besi nian. Ró besi dahuluk, Mikomaru harii iha tinan 1958.
Iha tinan 1968, Tuneishi ramata nia instalasaun reparasaun ho tonelada métrika 200,000. Kompañia introdús nia dezeñu ró-ahi padronizadu dahuluk, Ró Padraun Ekonómiku Tsuneishi (TESS). Ida-ne’e hahú ho série TESS40 iha tinan 1984.
Tsuneishi harii estaleiru ida iha Balamban, Cebu iha tinan 1994 iha Filipina. Iha 2003, empreza harii tan estaleiru ró nian iha Zhongshan, Xina.
Hafoin ne’e empreza introdús produtu emblemátiku seluk, série bulker Kamsarmax iha 2005. Nia hanaran tuir Port Kamsar tanba nia hale’u komprimentu másimu ne’ebé bele tama iha portu tasi nian iha Guiné.
Jornalista : Hortencio Sanchez
Editór : Cancio Ximenes
