Horta apoia família Robino iha Tasi-Tolu ne’ebé buka moris husi lixu
DILI, 07 Jullu 2025 (TATOLI)—Prezidente Repúblika, José Ramos Horta, halo ona intervensaun hodi apoia família ida ho membru na’in-hitu (7) ne’ebé moris iha kondisaun ladun favorável iha Tasi-Tolu, Dili, semana kotuk.
Xefe Estadu orienta ekipa Prezidensiál, unidade Servisu Sosiedade Sivíl no Asuntu Sosiál atu fó asisténsia imediata no oportunidade edukasionál ba labarik sira.
Família ne’e inklui inan-aman Robino Florival do R. Madeira no Francisca dos Santos Barreto, no oan ki’ik na’in-lima (5) durante tinan barak nia laran hela iha uma improvizadu baraka ki’ik ida, ne’ebé laiha asesu ba servisu esensiál sira no loro-loron hatutan moris hhusi lixu tanba liuhusi atividade hili lixu iha lixeira Tibar mak bele sustenta nia família.
Xefe família Robino Florival hateten, durante tinan barak hela iha fatin ne’ebé ladun di’ak no moris kada loron hili de’it kalen aat sira iha lixeira Tibar hodi faan no ai-han sira-ne’ebé liu ona prazu hodi konsumu.
“Ha’u halibur sasán sira-ne’e, ha’u hetan osan hodi sosa foos no modo ba labarik sira atu han. Iha semana ida-nia laran, ha’u hetan másimu $5-$10. Sasán di’ak balun ha’u lori mai uma hodi uza fali. Lixu plástiku di’ak balun ne’e, ha’u uza hodi didin ba uma,” Robino Florival liuhusi nota ne’ebé TATOLI asesu husi mídia Palásiu Prezidensiál, ohin.
Família nia situasaun subliña dezafiu sósiu-ekonómiku luan liu ne’ebé Timor-Leste hasoru, iha ne’ebé família barak laiha asesu ba hela-fatin permanente, bee-moos, eletrisidade, ai-han no edukasaun.
Labarik na’in-rua (2) husi labarik sira, Paya ho tinan 10 no Moko ho tinan hitu (7), obrigadu atu husik eskola primária tanba mukit, enkuantu maun-alin ki’ik na’in-tolu (3) hela iha uma no labele asesu ba eskola.
Durante ekipa Prezidensiál nia vizita, ne’ebé koordena liuhosi unidade Servisu Sosiedade Sivíl no Asuntu Sosiál, família hato’o agradesimentu klean no esperansa ba oan sira-nia futuru.
Nu’udar inan, Francisca dos Santos Barreto, sente emosional bainhira ko’alia kona-ba nia oan sira-nia di’ak.
“Ami bele moris iha kondisaun ne’ebe ladi’ak, maibé ami-nia oan sira tenke ba eskola, tanba futuru ne’e sira-nian,” nia dehan.
Vizita ne’e halo parte iha Prezidente Ramos Horta nia inisiativa sosiál sira-ne’ebé kontinua hodi defende direitu báziku ba sidadaun hotu-hotu, partikularmente família sira-ne’ebé vulnerável liu.
Nu’udár rezultadu husi intervensaun Prezidensiál, oan-feto na’in-rua ho idade eskolár sei tama iha orfanatu madre sira-nian, iha ne’ebé sira bele hetan edukasaun no sira-nia nesesidade báziku sira asegura ona.
Koordenadór Unidade Servisu Sosiedade Sivíl no Asuntu Sosiál, Teresa dos Santos Ximenes, esplika Prezidente nia kompromisu fó apoiu nesesidade bázika ba família vulnerável.
“Ita-nia Prezidente, bainhira de’it nia haree no sente sofreaentu povu nian, orienta ami mai. Lori ita-nia Prezidente nia naran atu apoia nesesidade báziku ba família no ajuda adisionál ba labarik feto sira bele estuda ho madre sira. Ida-ne’e hamenus todan ba família,” nia hateten.
Família ne’e mós husu ona asisténsia Governu nian ba fornese eletrisidade no bee-moos ba sira-nia área. Husi Prezidénsia sei hato’o preokupasaun hirak ne’e ba autoridade relevante sira.
TATOLI
