DILI, 08 Jullu 2025 (TATOLI) – Kooperativa Kréditu Defisiente Timor-Leste (CCD-TL, sigla portugés) fó asesu finaseiru ba ema ho defisiénsia, hanesan parte ida atu inklui sira iha dezenvolvimentu ekonómiku.
Prezidente CCD-TL, Evaristo da Conceição, dehan kooperativa ne’e harii iha 29 Marsu 2017, ho objetivu atu ajuda ema ho defisiénsia sira ne’ebé la asesu ba serbisu bankáriu nian.
Daudaun CCD-TL rejista ona membru hamutuk 572, kompostu husi membru 200 hanesan ema ho defisiénsia no restante la’e. Kooperativa ne’e halibur ona kapitál ho montante rihun $100-resin.
“Kréditu ne’e la’ós ba ema ho defisiénsia de’it, maibé ba mós ema vulneravel sira ne’ebé hola parte iha kooperativa. Membru sira susesu halo sira-nia uma, moris mesak, depois balun hola karreta, motór”, dehan.
Evaristo esplika prosesu fó kréditu ba membru sira ne’e fleksivel tebes, bazeia ba kondisaun no orsamentu ne’ebé membru sira iha. Ba dahuluk atu rejista kada membru ho kontribuisaun inisiál $35 no kontinua rai osan to’o $90, kooperativa bele fó kréditu $200. Kréditu ne’e depois bele aumenta tuir nesesidade no kapasidade pagamentu husi membru sira ho juru 1% iha kada fulan.
Kooperativa ne’e la’ós foka de’it ba rai no empresta, maibé fó mós espasu ba maluk defisiente no ema vulneravel sira atu halo atividade agríkola no haki’ak animál.
Ho atividade agrikultura ne’ebé membru CCD-TL halo, foufoun iha difikuldade atu transporta rezultadu bá merkadu, maibé atividade ne’e atrai maka sira-nia produtu ne’e ema bá sosa direta iha to’os-laran.
Iha sorin seluk, Prezidente Federasaun Nasionál Kooperativa Kréditu Hanai Malu, Elizário Ferreira, hateten iha kooperativa kréditu 47 mak iha Federasaun nia mahon no husi númeru ne’e iha rua mak kooperativa espesífiku ba ema ho defisiénsia, inklui CCD-TL ne’e.
Nune’e, FHM monitoriza kooperativa sira ne’e no fó prioridade ba edukasaun, promove solidaridade no kreatividade sosiál.
FHM dezenvolve formasaun ba membru sira, liuliu ba dirijente sira oinsá mak bele hatene lala’ok kooperativa hodi halo promosaun no organiza ema hotu bele hola parte iha kooperativa.
Diretór-Jerál Sekretaria Estadu Kooperativa (SEKoop), Olderico Lopes, hateten sira prontu apoia kooperativa sira bainhira presiza sira-nia tulun, tanba SEKoop mai ho vizaun atu harii sosiedade ida ho espíritu kooperativizmu no forte finansialmente no ekonomikamente.
Nia misaun mak harii no promove ekonomia inkluziva no la diskriminativa, hadi’ak kooperativa, no kria kondisaun ba empreza ki’ik sira atu sai fatór determinante ba dezenvolvimentu sosioekonómiku, haburas kooperativa kréditu atu sai intermediáriu ba asesu finanseiru.
Notísia relevante: SEKoop hakarak kria Loron Nasionál Kooperativa Timor-Leste
Jornalista: Arminda Fonseca
Editora: Maria Auxiliadora
