OEKUSI, 09 Jullu 2025 (TATOLI) – Sekretáriu Estadu Toponímia no Organizasaun Urbana (SEATOU), Germano Santa Brites Dias, hato’o agradesimentu ba komersiante no okupante sira iha merkadu Numbei, tanba koopera hodi sobu rasik uma, kioske no animál fatin.
Notísia relevante:SEATOU alerta ba abitante Kiumaria no Palaban iha Oekusi hahú buka fatin
Tuir nia, iha loron 24 Marsu 2025, SEATOU fó sai aviza atu hamamuk fatin to’o loron 24 Abríl 2025, maibé la akontese no SEATOU fó tan tempu fulan ida to’o Juñu presiza hamamuk ona fatin tanba merkadu referidu atu halo konstrusaun foun.
“Ha’u sente kontenti tebes, tanba maluk sira iha merkadu Numbei, sira kompriende saida mak ita ko’alia. Ema Oekusi ne’e, ema laran-di’ak, maske ko’alia iha kotuk ita la rona, maibé iha oin, sira hatan no realidade muda ona sasán. Laiha protesta no laiha problema hasoru autoridade RAEOA, ne’e hatudu katak koopera atu apoia dezenvolvimentu, atu hadi’a duni merkadu ne’e,” nia dehan iha Oekusi, hafoin observa situasaun iha merkadu Numbei.
Autoridade governanmentál ne’e informa, Governu la’ós duni nia populasaun maibé hakarak hadi’a merkadu ne’e, atu sai modernu uitoan, tan ne’e daudaun ne’e Autoridade RAEOA prepara ona merkadu provizória no tempu-badak sei muda mós negosiante iha merkadu laran atu fa’an provizória.
“Bainhira ramata mak ita muda fali sira ba fali idak-idak nia fatin. Tuir lista ne’ebé mak prepara ona, ne’ebé ohin ami ba haree kedas merkadu ne’e, komunidade sira koopera di’ak tebes, sira-ne’ebé halo uma permanente iha rai Estadu ka merkadu laran, sira sobu rasik, no dadús sira-ne’e, agora daudaun iha ona Autoridade RAEOA nia liman, hodi hein ba prosesu kompensasaun,” nia dehan.
Notísia relevante:Garante ijiene – orden públiku, SEATOU disemina dekretu-lei nú. 3/2024 iha RAEOA
Iha biban ne’e, Jestór Merkadu Numbei, Fernando Neca Souza, rekomenda katak, Governu presiza halais prosesu indemnizasaun tanba iha família balu to’o agora seidauk iha rai no uma atu hela hodi fa’an sira-nia sasán.
“Ami husu sei bele ganti-rugi ne’e tenki fó ona, tanba balu kreditu iha banku, depois fatin no uma laiha oinsa atu fa’an hodi hetan osan, tanba uma ami sobu hotu ona, depois merkadu provizória ne’e mós seidauk iha kondisaun oinsa atu hela, tan ne’e espera Governu labele haluha ami, tanba ami la servisu, ami-nia moris mak liuhusi faan sasán,” nia informa ba SEATOU iha merkadu Numbei.
Nia rekmenda mós katak, bainhira merkadu provizória konklui ona, atu muda negosiante kontinua fa’an sasán iha fatin provizóriu ne’e, Governu presiza apoia kalén atu halo fali fatin hodi fa’an, no konstrui saneamentu ijiene hanesan toilet no lixu-fatin (lixeira).
“Ami lakohi halo impedimentu ba programa Governu nian, se Governu hadi’a merkadu ne’e, tenki hadi’a duni, labele hein kle’ur tan, tanba ami koopera mak sobu rasik ami-nia hela-fatin. Se ami impede karik, ami la sobu ida, ne’ebé ami husu Governu tenki aselera konstrusaun foun. Ami mós hakarak merkadu ne’e tenki hadi’a duni,” nia rekomenda.
Notísia relevante:Abitante na’in-154 iha merkadu Numbei koopera ho SEATOU sobu rasik sira-nia uma
Tuir observasaun Jornalista Ajénsia TATOLI,I.P, nota durante SEATOU vizita iha merkadu Numbei, negosiante sira koopera di’ak tebes hodi akompaña ekipa SEATOU observa merkadu provizória no laiha dezentendimentu, maske antes ne’e iha loron 05 Juñu 2025 negosiánte sira, idak-idak sobu rasik sira-nia hela fatin no kioske.
Notísia relevante:FOTO ATUÁL: SEATOU apela vendedór merkadu Numbei hamamuk fatin to’o 24 Abríl
Jornalista: Abílio Elo Nini
Editór: Rafael Ximenes de A. Belo
