DILI, 12 Jullu 2025 (TATOLI)—Banku Nasionál Komérsiu Timor-Leste (BNCTL, sigla portugés) iha ámbitu komemorasaun aniversáriu ba dala-14, Sábadu ne’e, lansa servisu bankáriu foun liuhusi plataforma dijitál hanaran KOHE, atu fasilita trasasaun online (pagamentu ka transferénsia oosan) entre kliente sira.
“Ohin iha momentu ida-ne’e mós ami halo lansamentu ba aplikasaun KOHE ba sistema foun ida karteira dijitál ne’ebe ita hanaran KOHE hodi bele halo pagamentu iha fatin negósiu, bele halo transferénsia entre produtu KOHE ho KOHE,” Prezidente Konsellu Adminitrasaun BNCTL, Januário da Gama, informa ba jornalista sira iha Sentru Konvensaun Dili (CCD).
Tempu badak sei halo sosializasaun ba komunidade atubele intende utilizasaun sistema KOHE atu nune’e iha efisiénsia no efitivu.
“Sistema ida-ne’e ajuda halo espasaun no promove ba servisu inkluzasaun finanseira tanba Banku Sentrál fó indikadór ida ba banku komersiál hotu atu pagamentu hotu tenke ho forma dijitál,” nia akresenta.
Banku Sentrál rekomenda ba kliente sira, to’o tinan 2029 tenke iha ona mudansa ba pagamentu hodi redús ona selu direta ba 60%.
“Signifika labele lori ona osan cash maibe liuhusi pagamentu ho forma dijitál,” nia katak.
Notísia relevante : HNGV-BNCTL asina ona MoU atu estabelese pagamentu dijitál
Iha fatin hanesan, Governadór Banku Sentrál Timor-Leste (BCTL), Helder Lopes, husu ba dirijente BNCTL atu hadi’a liutan sistema bankária no banku movel hodi nune’e bele fasilita kliente nia tranzasaun di’ak liután.
“Banku Sentrál dalabarak sei haree ema mai hamriik iha ita-boot sira-nia fatin serbisu, signifika ita-nia servisu seidauk digitalizadu no seidauk efisiente. Tanba ne’e, hanesan hanoin ida hakarak hato’o ba BNCTL atu hadi’a ita-boot sira-nia servisu ho di’ak liután ,” Helder Lopes, hameno.
Ministru Komunikasaun Transporte, Miguel dos Santos Martins Manutelu, lori Governu nia naran felisita BNCTL ba aniversáriu ba dala-14 no nota durante ne’e halo ona knaar ba dezenvolvimentu ekonomia nasionál iha Timor-Leste.
“Iha oportinidade ida-ne’e, hakarak apresia dezempeñu servisu BNCTL nian ne’ebe amigável tebes no kontinuisaun ba dezenvolvimentu, BNCTL domina konta bankária rai-laran ho fininasiamentu produtu ne’ebé ho 75%,” nia hato’o.
Governu akompaña BNCTL hatudu duni esforsu no dedikasaun tanba liuhusi rezultadu ne’e refleta kontestu ekonomia nasionál ho istimasaun vensimentu ba públiku .
Jornalista : Felicidade Ximenes
Editora : Julia Chatarina
