DILI, 15 Jullu 2025 (TATOLI)—Federasaun Atletizmu Timor-Leste (FATL) ho Ministériu Edukasaun (ME) koordena malu hodi solusiona atleta sira partisipa ezame trimestrál daruak.
Prezidente FATL, Afrânio Xavier rekoñese situasaun referida sei iha influénsia ba preparasaun liuliu mentalidade atleta sira-nian tanba kuandu falla utrapasa iha ezame sei fó impaktu ba karreira desportu nian.
“Ami iha koordenasaun ho Ministériu Edukasaun,” Prezidente AFTL informa iha edifísiu TATOLI, Faról, Dili, Tersa ne’e.
Afrânio konfesa katak koordenasaun entre Federasaun ho ME referidu foku ba oinsá eskola fasilita atleta sira-nian kontinua tuir ezame maibé iha tempu hanesan atleta sira kontinua halo preparasaun ba eventu jogu CPLP tanba atleta modalidade atletizmu selesionadu husi munisípiu.
Atleta na’in-12 referida atualmente konsentra hamutuk ona iha Otél Ramelau. Husi numéru referidu, atleta na’in-neen mak tuir ezame trimestrál daruak, enkuantu na’in-neen seluk nafatin foku ba treinu antes hala’o jogu iha eventu CPLP.
Entretantu, tuir kalendáriu ne’ebé publika husi Komisaun Organizadora, atleta husi Modalidade Atletizmu sei hahú jogu iha 21-23 Jullu, iha-ne’ebé sei halo abertura iha loron 19 Jullu semana-ne’e.
Jornalista: Natalino Belo
Editór: Xisto Freitas da Piedade
